Cardiff MS. 1.362 (Hafod 1) – page 87r
Brut y Brenhinoedd
87r
amlỽc yỽ dyuot y deu beli a chustenin. ac ar|aỽr hon yd
ym y|th kaffel titheu yn trydyd kan yttys yn adaỽ
blawed* anrydedaỽ amherodraeth rufein it. Ac ỽrth
hymny* bryssya titheu y gymryt y peth ny ydiỽ duỽ
yn annot y rodi yt trỽy y haelder ef. bryssya y darestỽg yr
hỽn yssyd yn bynnu* bot yn darystygedic bryssya y
dyrchauel ty wy* a|th teulu y rei ny ochelant o|r byd
reit rodi eneideu y|th dyrchauel titheu ac y|th vrdaỽ;
Ac yn nerth yr negys hon miui a chweneccaa ty lu
ti o degmil o varchogyon aruaỽc. A gỽedy hynny y
dyrchewis araỽn vab kynuarch y ymadraỽd ynteu
yn|y wed hon. yr pan derchewis vy argỽyd* i heb ef
damlewychu y vedỽl a|e darpar kymeint lywenyd a|dis+
cynỽys ynof|i ac na allaf|i y venegi ar vyn tauot
kanyt|oed dim genhyf y saỽl teyrnnassoed a werys+
cynassam gan dianc gỽyr rufein a germania heb y
darestỽg a dial ar·nadunt yr aruaeu trymon a wnaeth+
ant ỽynteu gynt oc an rieni ninheu. A chan ytys yn
darogan bot kyffranc rom ni ac ỽynt mỽy no dirua+
ỽr lywenyd yssyd ynof am hynny a chymeint yỽ
arnaf sychet yỽ gỽaet a phei bythỽn heb diaỽt tri di+
eu a|their nos a gỽelet ffynnyon rac vy mron. arglỽyd
heb ef gỽyn y vyt a arhoei y dyd hỽnnỽ yn yr hỽn
y kaffem ymgyuaruot ac ỽynt melys o welioed
vydei genyf i y rei a|gymerỽn tra vythỽn yn keissaỽ
dial vy rieni ac yn amdiffyn yn gỽlat ac an rydit
Ac yn dyrchauel an brenhin. Ac chỽanaccau ty lu
mi a rodaf dỽy vil o wyr aruaỽc heb eu pedyt. A
| « p 86v | p 87v » |