Cardiff MS. 1.363 (Hafod 2) – page 203v
Brut y Brenhinoedd
203v
ndeyn en daly llys. ac en gwyskav coron e teyr+
nas am y penn. a holl tywyssogyon e ssaysson
y gyt ac ef eythyr osswy aelwyn e hvnan
y gyt a henny holl tywyssogyon e brytanye+
yt. peanda a devth at e brenyn a govyn ydav
pa achavs na dothoed osswy aelwyn e hvnan
yr llys annot vn tywyssaỽc o|r saysson. Ac gwedy
dywdwyt* o|r brenyn ydaỽ e mae o achavs e vot en claf.
peanda a dywaỽt wrthav. Nyt yr henny arglwyd hep
ef. namyn y kennadeỽ a enỽynaỽd hyt en Germany
en ol e saysson y dyal osswalt y vravt arnam ny my a
thy. Ac y gyt a henny peanda a dywavt ry torry oh+
onaỽ ef e hvnan tangnheved e teyrnas pan dyholyes
alffryt y vap ac oytwalt y ney vap y vravt o teyrn+
as nordhamhymber. Ac wrth henny ef a erchys er
brenyn kanhyat o|y lad nev enteỽ o|y dyhol o|r te+
yrnas en hollaỽl. AC wrth henny gwedy me+
dylyaỽ o|r brenyn llawer eng kylch henny ef a er+
chys o|y kynghorwyr medylyaỽ pa peth a kyngho+
rynt am henny. Ac val ed oedynt e velly pavb en
mynegy y kynghor. Maredvd brenyn dyvet em
plyth pavb a dyvavt. Arglwyd vrenyn hep ef ka+
| « p 203r | p 204r » |