Cardiff MS. 1.363 (Hafod 2) – page 79v
Brut y Brenhinoedd
79v
o evr ac aryant enys prydeyn a|e marchogyon a|e
hymladwyr e gelly tytheỽ goreskyn rỽueyn eny bw+
ynt gwrthladedyc y hamerodryon o·honey. Ac y+
velly e kynydvs cvstennyn de kar ty. a llawer hev+
yt o ỽrenhyned prydeyn a oreskynnassant rvueyn
AC vrth henny vfydhav a orvc maxen wrth
kyghor mevryc vap karadavc. a chychwyn y
y* gyt ac ef tv ac enys prydeyn. ac ar e fford ef a ores+
kynnvs keyryd ffreync a|e dynassoed. ac a kynwll+
vs llawered ac amylder o evr ac aryant ac o pob p+
arth ydav e kytemdeythokavs llawer o varchogy+
on. Ac odyna ar e mor ed aethant. ac o herwyd hw+
ylyev e dyskynnassant em porth hamvnt. Ac gwe+
dy kennataỽ henny y evdaf brenyn e brytanyeyt
ofynhav en vavr a orvc a thebygv ry dyvot en dys+
syvyt gelynyavl lw am penn y kyvoeth. Ac en dya+
nnot galw kynan meyryadavc y ney attav. ac er+
chy ydav ef kynwllaỽ holl varchogyon arvaỽc enys
prydeyn a mynet en erbyn e gelynyon henny. Ac
en e lle en dyannot kynan meyryadavc a kynvllvs
e llw llwyrhaf a mwyhaf ac allvs holl yevenctyt
e teyrnas a|e dewred oed henny ac aeth hyt em por+
th hamvnt en erbyn y llw a dothoed y gyt maxen
| « p 79r | p 80r » |