Oxford Jesus College MS. 119 (The Book of the Anchorite of Llanddewi Brefi) – page 112v
Ystoria Adrian ac Ipotis
112v
ar archegylyonn. a|hynny a|oruc ef
dyỽ llun y|goruc ef yr ỽybrev. ar lleuat. ar heul
ar syr. y|rodi goleuni ohonunt. a|dyỽ maỽrth
y|gỽnaeth iessu y|moroed. ar tired. ar phynnhon+
nev y|ardymery y|dayar yn galet ac yn veddal.
ar koet ar llyssev ar glasỽellt ar gỽeithredoed o|r
a|vynnaỽd. A|dyỽ merchyr y|gỽnaeth ef y|pysgaỽt
yn|y llynnoed ac ednot yn ehedec. a|gorchymynn
vdunt mynet gogyll y|byt y ganhorthỽyaỽ y
ymborth y|gnaỽdaỽl dynyon. A|dyỽ ieu y|goruc
crist. yscrybyl ym mynyded ac ymro. a|rodi tir
vdunt yg|kyueir eu porthant. ac erchi vdunt
troi dynyon y|da pressennaỽl. A|dyỽ gỽener y|gor+
uc ef adaf ar|y|lun e|hun. ac y|dodes enỽ arnaỽ.
ac y|gỽnaeth yn ỽr medyanus. Ac y|rodes byỽyt
idaỽ o|r yspryt glan. ac o assen y|adaf y|gỽnaeth
Eua ac y|rodes ef yn gymar idaỽ. Ac y|gỽnaeth
yn arglỽyd ar holl paradỽys. A|dyỽ sadỽrnn gỽe+
dy medylyaỽ pob peth y benndigaỽd y ỽeithredo+
ed trỽy eỽyllys da yn vchel ac yn isel. ac erchi
vdunt amlav pob vn yn|y van ohonunt. A|dyỽ
sul rac ỽyneb y|gorffỽyssaỽd iessu. Ac erchi y|ba+
ỽp o|gnaỽdaỽl dynyon kymryt yn|y cof orffỽys
yn|y dyd hỽnnỽ. ac ymoglyt rac pechodeu marỽ+
aỽl. a gỽassanaethu duỽ. ar eglỽys catholic.
| « p 112r | p 113r » |