Oxford Jesus College MS. 119 (The Book of the Anchorite of Llanddewi Brefi) – page 132r
Breuddwyd Pawl
132r
thev geuaỽc vuaỽch. A lladronn. kebydyon. kyng+
horvynnus. balch. a|distryỽ yr eglỽysseu. Ac attal de+
gemmev. A|phob amryuael drỽc heb ỽneuthur dim
da. nac vn pryt nac alussen. Ac yna y|gostyngha+
ỽd mihagel archangel. A phaỽl ebostol a milyoed
o engylyon gyr bronn duỽ y adolỽyn idaỽ rodi gor+
ffỽys dyỽ sul yr eneidev a oedynt yn vffernn. Mi
a|rodaf heb yr arglỽyd iessu yr mihagel. Ac yr pa+
ỽl ebostol. Ac yr vyn dayoni vy hun orffỽys vdunt
o aỽr naỽn dyỽ sadỽrnn hyt aỽr prim dyỽ llun.
Ac yna drychauel y ar y|pennev a oruc etyrval drys+
saỽr vffernn. A cerebius y|gi. A|thristav yn|vaỽr. A|lla+
ỽenhav a|oruc y|nifer a|oedynt yn vffernn. A|dyỽedut
ygyt oll. ni ni a|dyỽedỽn dy|uot ti yn vab y|duỽ byỽ.
kan rodeist ti yni orffỽys duỽ sul e|hun. Ac vrth
hynny pỽy bynnac a henrydedho dyỽ sul. ef a|uyd
kyfrannaỽc ac a orffỽys gyt ac engylyon nef. Ac
yna y gofuynnaỽd paỽl yr angel py saỽl poen ysyd
yn vffernn. Ar aghel a dyỽat. petei pedeir mil a|deu+
gein mil a|chan mil yn rifaỽ poenev vffernn. a|phe+
dỽar tauaỽt hayarnn ym|penn pob vn ohonunt.
ny phereynt yn rifaỽ poenev vffern. ỽrth hynny pỽy
bynnac o·honam ni a|glyỽho meint poenev cristono+
gyon agkredadỽy. A meint lleỽenyd yr eneidev kyfy+
aỽn buchedaỽl. A meint a|diodefaỽd crist yr·hom ni
| « p 131v | p 132v » |