Oxford Jesus College MS. 119 (The Book of the Anchorite of Llanddewi Brefi) – page 56v
Ystoria Lucidar
56v
na uyd. namyn goleuni ar uod y|groc. gloy+
ỽach no|r heul. Paham yr|barnnv y|mab. am
vot yn|gyfuyaỽn yr neb y gỽnnaethpỽyt y
sarhaet idaỽ kymryt yaỽn kytboet y|tat ar
ysbryt glan yn kytlauuryaỽ ac ef. A|oes
yno eistedua idaỽ yntev y|eisted yndi. Megys
y|dyỽedir. Ef a eisted ar eistedua y|vedyant.
Crist a seif y|ymlad dros y|wreic boỽys*. Ac
gỽedy y|gorchyuycco y elynyon. a chymryt
y|wreic bỽys attaỽ. yd eisted ef yn|y veddy+
ant. Sef yỽ hynny. dynyolaeth yn gorffỽys
y|myỽn dỽyỽolder. Ac eissoes ar yr eistedua yỽ
peri o|e eglỽys orffỽys o|e holl lauur. Ac eisso+
es kannys ymdengys dyn yno. ef a|gredir ei+
sted ohonaỽ val braỽdỽr ar eistedua a|gymero
o|r aỽyr. A|uyd eisteduaeu yr ebestyl. megys y
dyỽedir. chỽi a|eistedỽch ar deudec eistedua.
Y|kytỽybot ỽy vyd y|heisteduaev ỽy. yn|y rei
gỽedy gorchyuygu y|byt. a|e wydyeu. megys
budygolyonn y|gorffỽyssant yn|y heisteduaev
ac ef a|welir eisted ohonunt ar eisteduaev o|r
awyr. megys y|dyỽedir. ỽynt a|eistedant yn|y
vraỽt. ar yr eisteduaeu. Pa ffuryf y|byd y|vra+
ỽt. kymysgedic ynt yr aỽr honn a|drỽc a|da.
Ac ef a|debygir bot yn da y|rei drỽc. a|bot yn
| « p 56r | p 57r » |