Oxford Jesus College MS. 57 – page 134
Llyfr Blegywryd
134
bysrỽyd ar yr enỻip. ~ ~ ~
O R byd rodyeit ar wreic y ỽr. bit y gỽr dan
y gỽadaỽl hyt ym penn y seith mlyned.
ac o|r keiff hi teir·nos o|r seithuet vlỽydyn. hanner
y hoỻ|da a geiff y wreic. pan ysgaront. val|hynn
y rennir y da. Y moch a geiff y gỽr. a|r wreic y
deueit. Odyna y|wreic a rann a|r gỽr a dewis
dyeithyr y dotreuyn a rennir ual hynn. Y
ỻaethlestri oỻ y|r wreic onyt vn paeol. a|r dys+
gleu oỻ dyeithyr un dysgyl. a|r un paeol a|r
un dysgyl a geiff y gỽr. Y gỽr a|geiff y carr ac
un o|r gỽedeu. a|r hoỻ lestri ỻynn a|r kerỽyneu
oỻ. ac a vo arnunt o|r|diỻat gỽely. Os y|gỽr
ar hynt yna a|gymer gỽreic araỻ. ef a|dyly
anuon diỻat y gỽely kyntaf y|r ỽrthodedic.
Y gỽr a|geiff y gaỻaỽr a|r tapineu. a|r brecan.
a|r gobennyd. a|r kyỻdỽr. a|r vỽyaỻ gynnut.
a|r taradyr. a|r pentan haearn. a|r crymaneu
oỻ onyt un. a|r gradeỻ. Y wreic bieu y trybed
a|r badeỻ. a|r vỽyaỻ lydan. a|r gogyr. a|r sỽch.
| « p 133 | p 135 » |