Oxford Jesus College MS. 57 – page 41
Llyfr Blegywryd
41
deu bop amser. a|chynnal idaỽ e|hun y|trydyd. amser
y ryỽ dal hỽnnỽ yỽ. o wyth niwarnaỽt y gilyd o|r
pan enniỻer. ac yn|y dyd y diffyckyo y|r kynnogyn
talet y mach cỽbyl o|r a|oed yn ol. a|ỻyna vechnia+
eth a|bara dros oet dyd. Eil yỽ. adaỽ r wlat o|r
kynnogyn kynn oet dyd tal neu wedy. os kynn
oet dyd tal. talet y mach y neiỻ hanner. a phar+
haet y vechniaeth ar yr hanner araỻ hyt ar
deruyn vn|dyd a blỽydyn. ac yna talet y mach
gỽbyl o·ny seif y kynnogyn ỽrth gyfreith a|bit
ryd y|r mach ovyn y kynnogyn pan y mynno.
Os gỽedy yr oet·dyd edrycher ae o|waỻ yr|haỽl+
pleit am gyrchu kyfreith amseraỽl ae nat ef.
Amser y gyfreith ynteu yỽ. gỽneuthur kyffro
o vyỽn teruyn naỽ niwarnaỽt. gan rifaỽ oet
dyd tal. ỽrth nat perffeith rodi amser a uo byr+
rach. rac damchweinyaỽ dylyet haỽl pleit yn
amryuaelyon leoed. ac ony|s kyffry trỽy gyfre+
ith gorsed a chỽyn. bit lithredic amser rỽym y
uechniaeth yn|ỻỽybyr ymdiỻỽng yn un mod
| « p 40 | p 42 » |