Oxford Jesus College MS. 57 – page 46
Llyfr Blegywryd
46
neu dauotrudyaeth. neu weithret a vo llei no|r
mỽyaf. sef yỽ hynny. kolofyn kyfreith.
K Yntaf kyfreith yỽ. menegi y|r ỻofrud y
ỻe yd oed y dyn a vynnei ef y lad. Eil yỽ
rodi kynghor y lad y dyn. Trydyd yỽ disgỽyl
brat ar y dyn. Pedweryd yỽ. dangos y|dyn a
uynnei ef y lad. Pymhet yỽ. mynet yng|kedym+
deithas y ỻofrud pan el y lad y dyn. Chỽechet yỽ
dyuot ygyt a|r ỻofrud y|r dref y bo y dyn yndi. a
ladher. Seithuet yỽ. Kymhorth y ỻofrud o lad y
dyn. Wythuet yỽ arỽydaỽ y dyn yny|del y|dyn
a ladho. Naỽuet yỽ. edrych ar lad y dyn gan y
odef. Dros pob un o|r tri kyntaf o|r affeitheu
ot adefir. naỽ ugeint aryant a|delir. a|ỻỽ can+
wr y wadu goỻỽng gỽaet o|r gouynnir. Dros
bop un o|r eil tri. deunaỽ ugeint a|delir a|ỻỽ deu
canwr y wadu ỻofrudyaeth o|r gouynnir. Pỽy
bynnac a|watto ỻofrudyaeth a|e haffeitheu yn
hoỻaỽl. ỻỽ dengwyr a deugeint a|dyry. a reith
y wlat yỽ honno. a|diwat coet a maes y gelwir
| « p 45 | p 47 » |