Oxford Jesus College MS. 57 – page 60
Llyfr Blegywryd
60
O deir fford y byd ryd mach am y dylyet kyfadef.
vn yỽ. o rodi oet heb gennat y mach dros yr oet
kyntaf. Eil yỽ. talu y dylyet. Trydyd yỽ o dỽ+
yn gauel am y dylyet. Oet mach y wybot
ae mach ae nat mach tri·dieu. Reit yỽ dyuot.
teir|ỻaỽ y·gyt ỽrth rodi dyn yn vach. ỻaỽ y mach
a|ỻaỽ y neb a|e rodo yn vach a ỻaỽ y neb a|e kyme+
ro. ac ymffydyaỽ o laỽ y laỽ. O|r byd vn ỻaỽ yn
eisseu o hynny yn ymffydyaỽ. balaỽc uechni
y gelwir honno. dy·eithyr y ỻe yd el dyn yn
uach kynnogyn drostaỽ e|hun ˄neu dros araỻ ny|s
rodho yn uach. Ansaỽd balaỽc uechni yỽ. bot
y neiỻ penn idaỽ yn rỽym. a|r ỻaỻ yn ryd. Ac
ỽrth hynny o|r kymer y dylyaỽdyr ffyd y talaỽ+
dyr ar dalu y dylyet. a ffyd y mach ar gymeỻ y
talaỽdyr. pob un o·honunt a|dyly gỽrtheb
o|e amot y|r dylyaỽdyr. Ony chymer o·nyt
ffyd un ohonunt. ny dyly dieithyr vn wrtheb
idaỽ. Heuyt o|r dyry mach y|ffyd y|r dylyaỽdyr
ar gymeỻ y dylyet idaỽ. ef a|dyly gỽrtheb idaỽ
| « p 59 | p 61 » |