NLW MS. Llanstephan 27 (The Red Book of Talgarth) – page 123v
Efengyl Nicodemus
123v
a gogonyant esgynnedigaeth yr arglỽyd Jessu grist yn|y groc.
A|gỽedy clybot o|r hoỻ seint a|r proffỽydi hoỻ ymadrodyon y
ỻeidyr y dywedassant o vn vryt. Bendigedic vych arglỽyd
dat hoỻgyuoethaỽc tragyỽydaỽl. tat y trugaredeu. am rodi
y|th bechaduryeit y kyfryỽ rat a hỽnn. ac a|e dugost ar o+
gonyant paradỽys y|th ysprydaỽl uuched di ac y|r ỻe dioge+
L lyma y rinwed dỽywaỽl a|glywssam [ laf. ameN.
ni ac a welsam barinus a leỽncius deu vroder evyỻ.
ac ny edir yni datkanu rinwedeu duỽ y ereiỻ. Mihangel
a|dywaỽt gan y ardystu y nyni. Eỽch y gaerussalem gyt
a|ch brodyr. ac yno ỻefỽch yn aỽch gỽedieu. a|ỻawenheỽch
o gyuotedigaeth yr arglỽyd iessu grist. ac a|ch kyuodes gyt
ac ef o veirỽ. ac na|dywedỽch dim ỽrth vn dyn. namyn
mut vydỽch. yny del yr aỽr y kanhatto yr arglỽyd yỽch dat+
kanu rinwedeu y dwyỽolyaeth ef. ac eissyoes mihangel ar+
changel a|erchis ynni kerdet dros eurdonen y|r ỻe goreu
a|dihenaf. yn|y ỻe y mae ỻawer a gyuodassant gyt a|ni. y
dystolyaethu kyuotedigaeth crist arglỽyd. kanys tri·dieu
y mae kennyat ynni y rei a gyuodassam o veirỽ. enrydedu
pasc yr arglỽyd yng|kaerussalem y·gyt a|n rieni byỽ yn
dystolyaeth y Jessu yn harglỽyd ni. a|n bedydyaỽ a|wneir
yn auon eurdonen gyssegredic y gymryt gỽisc wenn o
baỽp o·honam. Ac ym·penn y tri·dieu gỽedy enryded pasc
yr arglỽyd y dygir y gennym baỽp o|r a|gyuodassam y|n
heneidyeu. ac yn|dygir dros eurdonen. ac o hynny aỻan ny|n
L lyma y rinwedeu a|ganhadaỽd yr arglỽ +[ gỽyl neb.
yd ynni eu datkanu y chỽi. ac y rodi molyant kyf+
| « p 123r | p 124r » |