NLW MS. Llanstephan 27 (The Red Book of Talgarth) – page 13r

ỻawer. veỻy y kynnuỻir corff crist o lawer o etholedigyon.

a|megys y berwir y bara o nerth y tan. veỻy y pobet crist y

myỽn tanỻwyth o|diodeifyeint. a|r bara hỽnnỽ a|dywedir

y vot yn gic o achaỽs y aberthu drossom ni megys oen. ac

megys yd hidlir y gỽin o|r soec ac o|r graỽn. veỻy y kyssyỻ+

tir corff crist o laỽer o|r rei kyfyaỽn. ac y gỽasgỽyt yn|trafa+

el y groc. mal y gỽesgir y gin* yn|y drafael ynteu. ac am vot

bywyt yn heneit ni yn|y gỽaet. am hynny y troir y gỽin

yn waet. ac yn gwelet gosged y bara a|r gỽin yn eu|heilun

e|hunein. discipulus Pa delỽ y dywedir y vot ef yn gic ac yn waet.

Magister Med y sant diogel yỽ efo yỽ y corff a anet o|r wyry veir. ac

a|dibynnaỽd yn|y groc. ac a esgynnaỽd y|r nef. a|ỻyna paham

y trigyaỽd ef yn rith y bara a|r gỽin. rac bot yn aruthyr

gennyt gymryt myỽn dy eneu y gỽaet a|welut yn defni

o|e ystlys ef. neu vỽyta o|e gorff ynteu a thi yn|y welet. discipulus

Pa iechyt yssyd yndaỽ ef. Magister Y mỽyaf. megys y trossir y

bwyt yn gic y|r neb a|e bỽytao. veỻy y trossir pob ffydlaỽn

yn gorff y grist drỽy y bỽytaedigaeth hỽnnỽ. ỽrth hynny

kyt diodef a christ a|wnaỽn ni drỽy ymadaỽ a chwant y byt.

ac a|e wydyeu. ac an kyt·gladu a|wneir pan yn soder yn|y dỽfyr

bedyd. ac ỽrth hynny y sodir deirgỽeith ar gyfeir y teir person.

a|thrỽy vỽytaedigaeth y gorff ef y|n gỽneir ni yn vn gorff

ac ef. ac ỽrth hynny reit yỽ yn dwyn ni. y|r ỻe y|mae crist. discipulus.

A|vydei vỽy gleindyt y|neb a gymerei vỽyaf o·honaỽ ef. Magister.

Megys y dywedir am y manna. na bydei lei y|r neb a gynnuỻ+

ei ychydic no ỻawer. veỻy y mae paỽb yn kymryt kymeint

a|e gilyd ohonaỽ ynteu. kanys paỽb a vỽyta oen duỽ yn gỽbyl.