NLW MS. Llanstephan 27 (The Red Book of Talgarth) – page 168r
Cynghorau Catwn
168r
gỽeitheu y gỽybydir pechodeu. a gỽeitheu ereiỻ ny|wybydir.
Na|thremycka ỽr bychan y gorff. kanys agatuyd da yỽ y
gyngor a|e weithret kyt boet bychan. Darostỽng y|r neb
a vo trech no thi. kanys a·gatuyd kyt boet amheu ti a|or+
uydy arnaỽ amser araỻ. Na|chynhenna gywira yn er+
byn y neb a gerych neu a adnepych. kanys mynych yỽ
tyfu ỻit maỽr o eireu bychein. a|ỻit a beir ymlad ac emeỻdi+
gaetheu. Na cheis drỽy goel wybot dim o dirgeledigaetheu
ewyỻys duỽ amdanat. kanys heb dy|genyat ti y gỽnaeth
duỽ di. ac am hynny heb dy gyfrinach di y gỽna duỽ a vyn+
no amdanat. Na vyd gynghoruynnus kynny aỻo dy gyn+
gyt drỽc y araỻ. kanys blỽng yỽ yt y diodef. Byd da dan go+
ỻet yn wirion. kanys ny phery yn hir y neb a|th goỻedaỽd.
a|r coỻet a enniỻir ytti ual kynt. Na dỽc ar|gof hen ymgein+
yaỽ na ỻit. kanys dynyon enwir a|dygant ar gof hen elyn+
yaeth. Na vaỽl dy hun yn ormod ac na chapla dy hun yn or+
mod. kanys dynyon ynvytyon gorwac a|wnant ueỻy. Tra vo
amyl dy da aruer o·honaỽ yn gyuartal. kanys ef a|dichaỽn
ỻithraỽ y gennyt yn ychydic o amser. yr hynn a geisseist yn
talym o amser. Kymer arnat vot yn anoeth pan dechreuych
wneuthur ỻes y dyn. kanys doethineb maỽr yỽ ym·wneuthur
yn hurt yn|ỻawer ỻe. Gochel bechaỽt godineb a|chebydyaeth
kanys yn erbyn clot y maent. Na chret bop peth o|r a dywetter
ytt yn wastat. kanys anoethineb yỽ credu pob peth yn dio+
gel. rac meint a|dywedir. ac amlet pobyl yn dywedut. Ad+
nebyd pan bechyc* ar|diaỽt nat ydiỽ y bei ar y|diaỽt. namyn
ar y neb a|e hyfo yn anghymedraỽl. val yd adefych heint dy
| « p 167v | p 168v » |