NLW MS. Llanstephan 27 (The Red Book of Talgarth) – page 31r
Ymborth yr Enaid
31r
yỽ. kanys amperffeith yỽ caru y peth y gaỻer y gassau. ac
ymwahanu ac ef. ac angenn yỽ ymwahanu a|pheth daruot+
edic. Y kyntaf a|elwir kuedserch neu annwylserch. kanys ku
ac annwyl y dyly vot y serch a|gyssyỻto y serchaỽl a|e gary+
at yn dragywyd. Yr|eil a|elwir ynvytserch. kanys ynvyt yỽ y
serch a|difflanno gyt a|e serchaỽl. am hynny tremygedic yỽ
y kyfryỽ garyat hỽnnỽ ar dwyỻ·garyat. Y kyntaf yssyd
berffeithgỽbyl eidunserch anrydedus hỽnnỽ kanys gỽr+
thỽyneb yỽ y|r caryat araỻ knaỽdaỽl. ỻyma y fford y daỽ
yr annỽylserch gỽynvydic hỽnnỽ. Y drindaỽt vendigedic
o nef creaỽdyr pob|peth o|r a|weler ac ar ny weler. yndaỽ ef
e|hun y mae pob peth. kanys y·dan dri|pheth y kynhelir.
nyt amgen gaỻu a|gỽybot neu doethineb. a daeoni. a|r
tri|pheth hynny a|briodolir a|their person y drindaỽt. ka+
nys y|r tat y priodolir gaỻu. kanys efo yssyd hoỻ·aỻuus.
a hoỻ·gyuoethaỽc. Y|r mab y priodolir doethineb a|gỽybot.
kanys efo yỽ y gỽir doethineb a|gỽybot a gymerth dyna+
ỽl gnaỽt. ac a|wyr pob peth. Y|r yspryt glan y|priodolir daeo+
ni a|thrugared. kanys efo yssyd hoỻ·drugaraỽc. kanys o+
honaỽ ef drỽy y drugared y kymerth y mab y dynaỽl
gorff a|anet o veir wyry. Y teir person hynny kyt boet
pob vn o·nadunt yn perffeithgỽbyl duỽ. eissyoes vn duỽ
ynt yn vn dwyỽolder tragywydaỽl heb vot yn vỽy nac yn
ỻei y dwyỽolde* yn vn o|r teir person no|e|gilyd. nac yn|y teir
person y·gyt noc yn|vn ohonunt. nac vn o·nadunt yn gynt
no|e gilyd. nac un yn ol y gilyd. namyn y teir person yn gym+
haryeit gogyfoedyon gyttragywydolyon. ac a|elwir o dirge+
ledic
| « p 30v | p 31v » |