NLW MS. Llanstephan 27 (The Red Book of Talgarth) – page 59r
Ystoria Adrian ac Ipotis
59r
elly vynet yn|da kyn|gybellet. ac na delych vyth drchefyn*
y|r tir. O|th gyuarchaf vab synhỽyraỽl heb yr amhera+
ỽdẏr. Py amser y gỽneth* adaf y kam y gyrrỽyt o|e
achaỽs o baradỽys. y mab a dywaỽt mae y·rỽng aỽr
anterth a hanner dyd y kolles adaf y valchder. ac y
gyrraỽd angel kanhorthỽy ef. a chledyf aỽchlẏm glo+
yỽ tanllyt y diffeithỽch ynnyal y wledychu ef a|e epil
yn dragywydaỽl y myỽn gouelyeint* a gouut engira+
ỽl. Truan vu y adaf heb yr amheraỽdyr bot yn ky folet
a hynny. Py saỽl pechaỽt a|oruc adaf pann gymmerth ef
gnaỽt yn rieni ni. Seith pechaỽt gyt a|e ragoreu heb
y mab. a gogelet paỽb racdunt. Sef ynt y rei hynny.
Syberwyt. lleidyat. kamgret. glythineb. kynghoruynt.
Chỽant. llesged. a diogi. a lledrat. yg|kamsyberwyt y pecha+
ỽd adaf pan wnaeth ef y ewyllys e hun. a thorri gỽahar+
don duỽ. lleidyat dogyn oed ynteu pann ladaỽd y eneit
e hun. ac a doeth o epil o·honaỽ. y kythreul a|e duc ỽynt
y uffern. Kamgret agkredadỽy oed ynteu. o achaỽs idaỽ
wneuthur gorchemynneu* y kythreul. a chyfleỽni y holl e+
wyllys. yg|glethineb y pechaỽd ynteu yn honnedic pann
lewas ef yr aual a wahardaỽd duỽ racdaỽ ac rac y wreic.
Kyghoruynus chỽenychaỽl oed ynteu pan chỽennychaỽd
mỽy noc a|oed reit idaỽ. ac yn medu ar holl paradỽys.
lleidyr oed ynteu pann gymmerth yr aual gỽahardedic. a
wahardaỽd duỽ idaỽ. a dylyedus oed idaỽ diodef agheu
am y ledrat. Diaỽc vu ynteu ny allaỽd arnaỽ gyuot
o·dyno gỽedy|r oerweithret hỽnnỽ. yny deuth duỽ e hun.
| « p 58v | p 59v » |