NLW MS. Llanstephan 27 (The Red Book of Talgarth) – page 72r
Buchedd Beuno
72r
a|e rieni a|e rodassant. a|hynny o|duundeb. ac y·gyt a|r|sant
hỽnnỽ y bu ef drỽy ganhorthỽy duỽ yn dysgu yny wy+
bu yr hoỻ ysgruthyr lan. Odyna y dysgaỽd ef wassanaeth
a reoleu yr eglỽys. ac y kymerth urdeu ac y bu offeiryat.
Ac yna yd arganuu ynyr gỽent ef. brenhin oed hỽnnỽ
yn|y uann honno. yn uvud ac yn diweir ac yn hael. ac yn
gỽneuthur gorchymynneu duỽ ym|pob peth. ac erbyny+
eit yn anrydedus a|wnaeth ac yn garedic. a rodi idaỽ
modrỽy eur a|choron. ac ymrodi e|hun yn disgybyl ac yn
uynach y uenuo sant. a rodi idaỽ teir randir yn euas a|r
bobyl oỻ a|oed ar y rann·direu hynny a|e holl da byt. ac yn
yr amser hỽnnỽ y clefychaỽd tat beuno o heint an·obeith.
ac anuon kennat att veuno y vab a|oruc. ac erchi idaỽ
dyuot ỽrth y wendit a|e diwed. ac yna y dywaỽt beuno ỽrth
y gedymdeithyon a|e disgyblon. Arhoet tri ohonaỽch chỽi
heb ef yma yn|y dinas hỽnn. a minneu a|af y edrych vyn
tat yssyd yn wan glaf. ac ueỻy y gỽnaethant. a beuno
a|e gorchymynnaỽd ỽynt y|r brenhin ac y wyrda y wlat. ac
ynteu a|aeth racdaỽ hyt y ỻe yr oed y dat yn glaf. a|e dat
gỽedy kaffel kymun a|chyffes a diwed perffeith a|vu uarỽ.
Gỽedy hynny beuno a|drigyaỽd ar dref y dat. ac a|adeilya+
ỽd eglỽys. ac a|e kyssegraỽd yn enỽ yr arglỽyd iessu grist. ac
a|blannaỽd messen yn ystlys bed y dat. a honno a|dyfaỽd
yno yn|derwen diruaỽr y huchet a|e phraffet. ac ar vric
y prenn hỽnnỽ ef a ỽrthdyfaỽd keing hyt y ỻaỽr. ac
o|r ỻaỽr drachevyn yn o·gyfuch a|bric y prenn. a thrigyaỽ
elin y|r geing ar y ỻaỽr. ac ueỻy y mae yn wastat. ac ot a
| « p 71v | p 72v » |