NLW MS. Llanstephan 27 (The Red Book of Talgarth) – page 89v
Mabinogi Iesu Grist
89v
a saffrỽm. a Jacinctus. a ỻin. a phorffor. Ac yna y bỽryassant
brenneu y edrych pa|weith a|wnelei bop vn onadunt. ac y doeth
y veir gỽeithaỽ o|r porffor yn temyl yr arglỽyd. a phan y kym+
erth y dywaỽt y gỽerydon ỽrthi. kanys Jeuaf ỽyt ac u·uvdaf
ti a|haedyeist kynnal y porffor. ac ỽynt ual ar wattwar a|e ga+
lỽassant hi brenhines y gỽerydon. A thra yttoedynt yn hn*+
ny yr ymdangosses angel y·ryngthunt. na pheidyỽch chỽi
heb ef a|e galỽ hi ueỻy. kyt galwoch yn aỽr herỽyd gogan.
chỽi hagen a dywedassaỽch wir broffỽydolyaeth. Y gỽerydon
yna a ergrynassant yng|gỽyd yr angel ac yn|y eiryeu. ac
ỽynt a dechreuassant wediaỽ meir yna. a madeuant am eu
gỽattỽar. a gỽediaỽ drostunt. Dyd·gỽeith araỻ yd oed veir
yn ỻenwi ỻestyr prid o dỽfyr yr ymdangosses yr angel idi. ac
y dywaỽt ỽrthi. Gwynuydedic ỽyt ueir. kanys vchreeist* duỽ
y|th uedỽl o bressỽyluot. ỻyma y daỽ goleuni o|r nef y bressỽ+
ylyaỽ ynot ti. a thrỽydot ti y goleuhaa yr hoỻ vyt. a|r trydyd
dyd gỽedy hynny. a hi yn gỽneuthur gỽeith o borffor y
doeth gỽas ieuangk attei. a|e degỽch ny eỻit y datkanu. A
phan y gỽeles hi ef crynu o ovyn a|oruc. ac ynteu a|dywaỽt
ỽrthi. Meir heb ef nac ovynhaa di ti a gefeist rat y gan duỽ.
kanys ti a gefeist ueichogi. ac o hỽnnỽ y byd ytt uab. yr hỽnn
a vyd brenhin nef a daear. ac a|wledycha yn|yr oes oessoed. A
thra yttoed hi yn hy·nny. yr oed Joseph yn ỻe peỻ yn ỻauury+
aỽ. a saer prenn yno oed ef. ac yno y trigyaỽd ef naỽ mis.
A phan doeth drachefyn yd oed ueir yn veichaỽc. a phan weles
ef hynny. o diruaỽr ovyn a|govit y gelwis ar yr arglỽyd. a
dywedut ual|hynn. Arglỽyd heb ef kymer vy yspryt i. kanys
| « p 89r | p 90r » |