NLW MS. Llanstephan 27 (The Red Book of Talgarth) – page 96r
Mabinogi Iesu Grist
96r
ac rac ovyn ỻeuein o|r idewon arnunt. Ac yna y dywaỽt Jo+
seph yn|gystud·yaỽc. Ny beidyaf|i heb ef dywedut ỽrthaỽ ef
dim. meir dysc di efo. Ac yna y dywaỽt meir ỽrth Jessu.
paham heb hi y pereist di ynni cas y bobyl honn. a ni a
gaffỽn uolest gan y niuer hỽnn. v|arglỽyd dywet ym beth a
wnaeth y|r mab hỽnn uarỽ. Jessu a dywaỽt yna. teilỽng oed
y angeu. kanys ef a|wasgaraỽd y gỽeith a lauuryassỽn i. Y
uam a|e gỽed·iaỽd yna. v|arglỽyd na wna di ueỻy. kanys
paỽb a|gyuodant y|n herbyn ni. Ynteu yna a adnabu bot
y vam yn tristau. ac a|e droet deheu y trewis y mab marỽ
ar y dwy ffroen. ac y dywaỽt ỽrthaỽ. Kyuot uab yr ennwi+
red. nyt ỽyt teilỽng y vynet y deyrnas vyn|tat i. kanys gỽas+
gereist vyng|gỽeith. Ac yna ar|hynt y kyuodes y mab yn vyỽ.
a Jessu a|aeth ac a|duc y dỽfyr y hyttynt drachefyn yr aỽr
y herchis. ac yna yng|gỽyd paỽb y kymerth iessu y tom o|r
ỻynneu a|wnathoed. ac o|r rei hynny y gỽnaeth deudec ederyn.
duỽ sadỽrngỽeith heuyt oed hynny. Pan|wnaeth Jessu hynn
o betheu. a meibyon ỻawer y·gyt ac ef. pan weles un o|r idewon
Jessu y·gyt a|r meibyon yn gỽneuthur hynny y dywaỽt ~
ỽrth Joseph. Joseph heb ef. pony wedy|di y mab iessu yn gỽ+
neuthur gỽeith duỽ sadỽrn. ef a|wnaeth yr adar o|r ỻỽch y
dyd hỽnnỽ. a Joseph pan gigleu hynny a doeth att iessu ac
a|dywaỽt ỽrthaỽ. Paham heb ef y gỽney di duỽ sadỽrn y
kyfryỽ weith hỽnnỽ. yr|hynn nyt ryd yn·ni eu gỽneuthur.
a Jessu pan|gigleu hynny a|drewis y ỻaỽ yn|y ỻaỻ. ac a
dywaỽt ỽrth yr adar. ehedỽch. ac yr aỽr yd erchis ef hynny
ỽynteu a ehedyassant. a phaỽp yn|y welet ac yn|y warandaỽ
| « p 95v | p 96v » |