NLW MS. Llanstephan 4 – page 37r
Breuddwyd Pawl
37r
lythyr yn|y laỽ yn darỻein y weithredoed
da. a|e weithredoed yn barnu arnaỽ. a Mihangel
a duc yr eneit y baradỽys yn ỻe maent
yr hoỻ seint. a ỻefein a|wnaethant yr e+
neideu a|oedynt yn vffern pan welsant
yr engylyon yn esgynnu a|r eneit gỽi+
ryon ganthunt y baradỽys. a|chymeint
vu yr aỽr a rodassant a chyt kyffroei
y nef a|r daear. ac wylaỽ a|wnaeth pawl.
ac wylaỽ a|wnaethant yr eneideu o bop
kyfryỽ boen yn vffern a|ỻefein a dywe+
dut val|hynn. Trugarheỽch ỽrthym
vihangel archangel a phaỽl. Ac yna y
ỻefassant y·gyt oỻ Mihagel a|phaỽl
a mil o|vilyoed o engylyon. ac yna y
clyỽspỽyt ỻef yr engylyon hyt y trydyd
nef yn|dywedut. Trugarhaa di grist
ỽrth veibyon y dynyon. ac yna y gỽe+
les pawl. y nef yn kyffroi ac yn deissyfyt
mab duỽ yn disgyn o|r nef a|e goron am
y benn. Ac yna y ỻefassant eneideu uf+
fern o vn ỻef val|hynn. Trugarhaa di
ỽrthym ni vab duỽ goruchel. a|ỻef mab
duỽ a gigleu yr hoỻ eneideu a oedynt
ym|poeneu uffern yn dywedut ỽrthunt
val hynn. Pa ryỽ da a|wnaethaỽch chỽi
| « p 36v | p 37v » |