NLW MS. Llanstephan 4 – page 43v
Purdan Padrig
43v
val hynn. Gỽynuydedic ỽyt ti a gỽyn+
uydedic yỽ yr hỽnn yssyd y|th eneu di.
Y geneu ny chymerth eiryoet y digrif+
ỽch o vỽyt. kanys y vỽyt ef bara a
halen oed. a|dỽfyr oer oed y diaỽt. Ynteu
o|r|diwed megys y damunaỽd a|aeth yn
detwyd att yr arglỽyd duỽ. Diheu yỽ
hynn amgen yn amser padric sant
ac yn amseroed ereiỻ gỽedy hynny
ry vynet ỻawer o dynyon y|r purdan.
Rei o·honunt a deuynt drachefyn. E+
reiỻ a boenit yno ac ny deuynt. Y ca+
nonwyr a berynt ysgriuennu chỽed+
leu y rei a|delynt odyno a|e damchỽ+
eineu yno. Deuaỽt oed yno osso* os+
sodedic y gan badric sant ac a gedwis
y gỽyr a|vuant yn|y le ynteu gỽedy
ef; nat elei neb y|r purdan onyt trỽy
gannyat yr esgob. a|heuyt dewis o+
honaỽ o|e briaỽt ewyỻys mynet y|r
purdan dros y bechodeu. Y neb a ym+
lyccao y darpar trỽy vynet y|r purdan;
yr esgob a|dyly annoc idaỽ peidyaỽ a|r
darpar hỽnnỽ. a dywedut ỽrthaỽ ry
vynet ỻawer o dynyon yno yn
eu korffolaeth ac na doethant o
| « p 43r | p 44r » |