NLW MS. 3036 (Mostyn 117) – page 108
Brut y Brenhinoedd
108
vor ac ar tir yn keissaỽ amdiffyn pobyl mor lesc ac
ỽynteu y|gan grỽydredigyon ladron a gormessoed.
A bot ssened rufein yn blinaỽ o treulaỽ eu da ac eu
sỽllt mor wastat a hynny yn kerdet mor a thir. ac
yn diodef agheuolon perigleu drostunt. A bot yn
well gantunt dilyssu eu teyrnget no hynny. Ac y
gyt a hynny bot yn iaỽnach udunt e hunein kym+
ryt dysc ac aruer ar ymlad mal y|gellynt amdiffyn
eu gulat ac eu guraged ac eu plant ac eu goludoed.
ac eu rydit. A thros eu buched e|hunein. no dodi eu
gognỽt ac eu hymdiret yn wastat y|gwyr rufein.
A guedy daruot udunt menegi yr ymadrodyon
hynny y|r brytanyeit. erchi a|wnaethant kynullaỽ
ieuenctit ynys prydein a|e holl ymladwyr ac eu
dỽyn hyt yn llundein yn eu herbyn ỽynteu. ka ̷+
nys mynnu ymchoelut trachefyn y rufein yd oed+
ynt ỽy. A guedy eu dyuot yn llỽyr hyt yn llunde+
in; y|gorchymynnỽyt y guhelyn archescob llun+
dein pregethu udunt a|menegi yr ymadrodyon
yd oed wyr rufein yn|y adaỽ gantunt.
AC megys hyn y dechreuis yr archescob y ym+
madraỽd. Arglỽydi heb ef kyt archer imi
pregethu iỽchi. ys mỽy y|m kymhellir y ỽylaỽ
noget y dywedut pregeth ac amadraỽd vchel. rac
truanhet genhyf yr ymdiuedi a|r guander a dam+
weinỽys ichwi. guedy yspeilaỽ o vaxen ynys pry+
dein o|e marchogyon a|e hymladwyr. Ac a dieghis
| « p 107 | p 109 » |