NLW MS. 3036 (Mostyn 117) – page 259
Brut y Brenhinoedd
259
chadỽ hi; nyt oed uỽy ganthunt no dim y hamdif+
fyn hi rac kenedyl saesson. a rac pop kenedyl. Ac
ỽynt a uydynt arglỽydi ar yr holl ynyssed yn eu
kylch. Ac ny bu vn genedyl a allei ỽrthỽynebu udunt.
eithyr guyr rufein. A chyt bei darystygedic ar yspe+
it y wyr rufein; ỽynt a| gymhellỽyt eissoes o·honei
yn waradỽydus wedy llad eu tywyssogyon yn llỽyr.
Ac eissoes er pan duc maxen wledic a chynan meir+
adaỽc y dylyedogyon o·honei hyt y wlat hon; ny bu
yno yr hynny hayach a allei kynydu y breint idi
trachefyn. A chyt ryffei heuyt rei a gynydei udunt
eu breint o beth. ereill a vei wannach a gollei hyn+
ny eilweith. Ac ỽrth hynny dolur yỽ genhyf| i aỽch
guander. kanys vn genedyl ym. Ac o vn enỽ yn
gelwir brytanyeit megys chwitheu. Ar wlat
a| welỽch i yman; yd ym ni yn| y guarchadỽ hi ac yn| y
hamdiffyn rac paỽb oc an gelynyon yn ỽraỽl
A Guedy daruot y selyf dywedut yr ymadraỽd
hỽn. megys kewilydyaỽ a| wnaeth Catwalla+
ỽn. Ac atteb yr brenhin a oruc val hyn. Arglỽyd vren+
hin heb ef. duỽ a| talho it adaỽ nerth a chanhorthỽy
imi y| geissaỽ vyg kyuoeth trachefyn. A minheu
a|e diolchaf. Yr hyn a dywedy titheu bot yn ryued
genhyt llescet kenedyl ynys prydein. hyt na all+
assant kynhal breint eu hentadeu. guedy dyuot
y brytanyeit hyt y wlat hon. nyt reit ryuedu hyn+
ny herwyd y tebygaf ui. Sef achaỽs yỽ hynny;
| « p 258 | p 260 » |