NLW MS. 3036 (Mostyn 117) – page 26
Brut y Brenhinoedd
26
y·rygtaỽ a chorineus. kanyt oed dim digrifach gan+
taỽ no guelet y ryỽ gatwent honno. Ac y ymdrech
yd aeth corineus a|r kaỽr. A phop vn o·nadunt
a| gymyrth gauel ardỽrn ar y gilyd. Ac ymtrauodi
A guascu a wnaeth y kaỽr corineus attaỽ. A thor+
ri teir assen yndaỽ. vn yn| yr ystlys deheu. A dỽy
yn yr ystlys asseu. A llidyaỽ a oruc corineus. A
dyrchafel y kaỽr ar y yscỽyd a chyrchu pen kar+
rec uchel. A bỽrỽ yr aghynuil hỽnnỽ y ar y yscỽyd
trỽy yscithred kerryc y mor. hyny uu yn drylleu.
hyny goches y tonneu gan y waet. Ac yr hynny
hyt hediỽ y gelwir y lle hỽnnỽ. llam y kaỽr.
AC yna guedy rannu o Vrutus y teyrnas
yrỽg y wyr ynteu. yd edrychỽ ̷+
ys ynteu lle y bei teilỽg gantaỽ adeilat dinas
idaỽ. Ac y doeth hyt ar auon temys. Ac yno y
kafas lle a uu adas gantaỽ y adeilat. Ac yno yd
adeilỽys dinas. Ac y gelwis ef tro newyd. Ar
enỽ hỽnnỽ a| paraỽys arnaỽ hyt yn oes llud
vab beli braỽt y| gaswallaỽn vab beli. y| gỽr a|y
ymladỽys ac vlkessar amheraỽdyr rufein. A gue+
dy kaffel o lud y vrenhinyaeth; y katarnhaỽys
ynteu y dinas o geyryd. a| thyreu enrydedus. Ac
y| gelwis o|e enỽ e| hun kaer lud. Ac o|r achaỽs hỽn+
nỽ y bu teruysc y·rydaỽ a| nynhyaỽ y vraỽt
am geissaỽ diffodi enỽ tro oc eu gỽlat. A chanys
traethỽys gildas o hynny yn llỽyr. y| peideis i.
| « p 25 | p 27 » |