NLW MS. Peniarth 11 – page 190r

a|pha|ryỽ daryan oed idaw ef. Arglỽyd heb hi tra vu ef yn|y

tỽrneimant yd oed idaỽ ef arueu gỽynnyon. a|chyn no hynny yd

ymaruerei ef o arueu eureit. A unbennes heb·y laỽnslot. a|ad+

nabu ef walchmei neu walchmei ynteu. Nac adnabu arglỽyd

heb hitheu. am yr hynn y mae ef yn drist ac yn|doluryus. kan+

ys y marchaỽc hỽnnỽ yd oed ef yn|y geissyaỽ. Ae paredur oed

ef heb·y laỽnslot. Je arglỽyd arglỽyd* heb hi. Och vi heb ynteu

beth a|wnaei nas atwaenat ef. ac a|wdost di pa le yd aeth ef. Ac

ar hynny ymwahanu a|wnaethant ỽy. a marchogaeth a|oruc

ef yny yttoed yr|heul yn mynet y gysgu. a|r fforest yn tywyỻu

yn uaỽr arnaỽ. ac edrych o bop parth i·daỽ a|oruc ef. y edrych

a|welei un ỻe y gallei gael gorffowys yndaỽ. Ac ar hynny yr

oed corr wedy y arganuot ef. ac nyt arganuu ef y corr. yna

y corr a redaỽd ar|hyt ỻỽybyr bychan hyt yn|ỻe yr|oedynt y

marchogyon ỻadron. myỽn ryỽ lys udunt. ac yr oed udunt

ỽy le araỻ pan elynt y yspeilyaỽ. yn|y ỻys eissyoes yd oed vorỽ+

yn ieuanc yr honn a|sommei y marchogyon a|delynt fford yno

o wledyd ereiỻ. a|r|corr a|doeth att y vorwyn ac a|dywaỽt ỽrthi.

Ef a|weler heb ef yr aỽr·honn pa|delỽ y|dielych di ar y gỽr a

ladaỽd dy deu vroder a|th ewythyr a|th gevynderỽ. Mi a|brofaf

hynny heb hi. a|bit gennyt titheu aruot da y rybudyaỽ y

marchogyon ereiỻ. Bit ar vym|perigyl i heb y corr am|hynny.

Gan|hynny heb hitheu nyt oes fford idaỽ ef y dianc y gennym.

yny vo marỽ. Yr vnbennes a|oed vn o|r rei teckaf ac yn da y

gỽisgat. Eissyoes callon drỽc oed idi hi ac nyt oed ryued. ~

kanys ar gribdeil a|ỻedrat y magyssit hi. a hi e|hunan a|vuas+

sei ganhorthỽy y wneuthur ỻawer o|drỽc a|ỻedrat. ac ar hynny