NLW MS. Peniarth 11 – page 206v

a|wnaethant ar laỽr y neuad. Arglỽyd heb ỽynt ỽrth y brenhin

y kewilyd hỽnn a dangosset ytti vnweith araỻ. ac nyt emendaỽyt

yni dim yr hynny. a marchaỽc urdaỽl y dreic danỻet yssyd yn|diua

dy wlat. ac yn|ỻad dy wyr. ac a|daỽ yma yn|ehegyr. ac a|dywaỽt nat

oes yn|dy aỻu di hyder y wneuthur eniwet idaỽ ef. Kewilydyus

vu gan arthur y chwedleu hynny a chan walchmei a|laỽnslot am

na|s gadaỽd arthur ỽynt y vynet ar y|weith gyntaf. ar hynny

y pedwar marchaỽc a aethant ymeith ac adaỽ y ỻeiỻ yn ueirỽ

yn|y neuad. Ac yna y brenhin a|dristaaỽd yn vaỽr ac a|erchis

eu cladu. ac yna son a|berỽ a|gyuodes ar|hyt y neuad gan y mar+

chogyon urdolyon. a|rei a dywedynt na chlywssynt eiryoet

gormes kyn greulonet y lad gỽyr a|r dreic honno. ac ny dyly+

it heb ỽynt o·ganu gỽalchmei na laỽnslot yr nat elynt y ymlad

a|hi kanys nyt oed yn yr hoỻ vyt dim a aỻei oruot arnei ony

bei wyrtheu duỽ e|hun nac a|lafuryei yn erbyn peth kyndrỽc ac

a aỻei daflu fflam o dan drỽy y daryan y|geniuer gỽeith y myn+

nei. a thra yttoed y murmur hỽnnỽ ar hyt y neuad. nachaf yn

dyuot y myỽn morỽyn ieuangk yr honn a|oed yn kanhebrỽng

marchaỽc yn varỽ ar elor. ac yn dyuot hyt geyr|bronn y bren+

hin. ac yn dywedut. Arglỽyd heb hi mi a|adolygaf ytti yr duỽ w+

neuthur kyfyaỽnder a mi yn|dy|lys di. weldy racko walchmei dy

nei di yr|hỽnn a|vu kyn|no hynn yn|y dyrua o varchogyon urdol+

yon yn|y ỻannerch goch yn|y ỻe yd oed lawer o varchogyon urdolyon

a mab y wreic wedỽ yr|hỽnn yssyd y|th ymyl ditheu yn eisted ygyt ac

ef. Efo a gỽalchmei a gaỽssant y glot yn|y gynnuỻeitua honno.

Y marchaỽc yna eissyoes arueu gỽynyon oed idaỽ pan ymwanaỽd