NLW MS. Peniarth 11 – page 226v
Ystoriau Saint Greal
226v
a|thi yn|dyuot o geissyaỽ y cledyf yr hỽnn y ỻas penn ieuan
uedydywr. ac ef a vynnassit dwyn y cledyf y gennyt. a|drỽc vu
gennyt titheu hynny. Eissyoes ef a|roespỽyt itt drỽy amot
gỽneuthur ohonat yr|hynn kyntaf o|r a|archei uorwyn ytt. a
thitheu a|e kennetteeist idaỽ ar dy gret. Hynny heb·y gỽalch+
mei a|daỽ cof ymi yn|da. Minneu a|archaf ytti yr duỽ yr|dy brovi
a|wyt kyn gywiret ti ac y dywedir. ar dy uot hediỽ yn|waethaf
o|r a|del y|r tỽrneimant. ac ny cheffy amgen arueu no|r teu dy
hun yr peri y baỽp dy adnabot. ac ony wney di ueỻy ti a|ffey ̷+
lyost o|th|gret. a minneu af vy hun y venegi idaỽ dorri
o·hon at amot ac ef. A vnbennes heb·y gỽalchmei ny|th+
orreis i amot a|neb eirmoet o gaỻỽn y gywiraỽ. nac o|r bei gen+
nyf fford o|e gywiraỽ. ~ ~
G walchmei yna a wisgaỽd y arueu e|hun. ac ueỻy yr ym+
duc yn|y dyd hỽnny* hyt nat oed neb yn|y tỽrneimant
ny bei weỻ noc efo. ac yny oed lawer yn ryuedu ac|yn|dywe+
dut na welsynt eiryoet arueu tec y wr waeth a|e|dylyei noc ~
Meliot o loegyr a|oed yn mynet y geissyaỽ gỽalchmei. ac a|gy+
varuu a|thylwyth yn|dyuot o|r tỽrneimant. ac ef a|ovynna+
ỽd udunt a|wydynt ỽy vn chwedyl y ỽrth walchmei. ac vn
a ovynnaỽd idaỽ y ba|ryỽ beth y keissyei ef walchmei. Ar+
glỽyd heb·y|meliot gỽr idaỽ ỽyf|i o|tir a|daear. ac ef a|dyly
dyuot y warantu ym vyn|tir a|m daear yn erbyn pob dyn.
a nabigaỽns a|duc y gennyf vyn|tir a|m|daear. ac o|e|geissyaỽ
ynteu yd af|i y|m|kymhorth o gael vyn|tir drachevyn. Mynn
vym penn i heb·yr vn o|r marchogyon urdolyon ny wdam
| « p 226r | p 227r » |