NLW MS. Peniarth 11 – page 253r
Ystoriau Saint Greal
253r
namyn hynn a|ỽnn i y vilwryaeth ef a|wna ytti vỽy o afles
noc o les o|r|diwed. onyt ymogely yn weỻ noc yd|ymo·geleist
T Ewi y|mae yr ymadraỽd am [hyt hynn.
vriant yr hỽnn yd oed arthur yn|y gredu yn ormod.
ac yn dywedut am laỽnslot y vot yn kerdet drỽy amryuaely+
on leoed a|fforestyd yn vedylgar. ac ny marchocaaỽd ef hae+
ach. yny gyvaruu ac ef marchaỽc urdaỽl wedy|r vriwaỽ yn
drỽc. a|laỽnslot a ovynnaỽd idaỽ pỽy a|e briwassei yn|y mod hỽn+
nỽ ac o ba|le yd|oed yn|dyuot. Arglỽyd heb ynteu o|r capel periglus
o|r|ỻe ny aỻỽn i ym·amdiffyn rac ysprydyoed drỽc a|oed yno
y rei a|m anafaỽd i yn|y mod y gỽely di. A|phany bei dyuot
morwyn yno o|r fforest nyt athoedỽn i yn vyỽ odyno. a|hi
a|m nerthaỽd i dan amot o|r damchweinyei ym welet laỽnslot
neu paredur neu walchmei erchi y|r kyntaf a|welỽn onad+
unt vryssyaỽ attei. a|ryued yỽ genthi hwyret y|maent heb
dyuot y|r capel. kanys ny dyly dyuot yno onyt vn o·nadunt
ỽy yỻ|tri. a|ryued yỽ gennyf inneu vot yndi hi o hyder drigy+
aỽ yno. kanys periglussaf ỻe o|r a weleis eirmoet yssyd yno
ac vn o|r rei tecaf yỽ hitheu. a hi a|daỽ yno yn vynych e|hun.
ac y|mae yno marchaỽc newyd|lad wedy|r gladu myỽn ys+
grin. ac ny bu eiryoet medynt ỽy wr greulonach na dewr+
ach no hỽnnỽ. A wydut ti heb·y laỽnslot pỽy oed y henỽ ef.
Ef a|elwit heb ef anores vastart. ac nyt oed idaỽ vreich
namyn vn. Y breich araỻ ynteu a torrassit yn ymyl y casteỻ
| « p 252v | p 253v » |