NLW MS. Peniarth 11 – page 262r

y ewythyr. ac am bryt gosper ef a|doeth tu ac yno. Ac ef a|wel+

ei tri meudwy o|r|tu aỻan y|r cudugyl. yna ef a|disgynnaỽd ac

a|aeth yn eu herbyn. arglỽyd heb ỽy na dos di y myỽn. kanys

yd ys yn amdoi corff yno y|myỽn. Pỽy bieu y corff heb·y pare+

dur. Arglỽyd heb y meudwyeit corff brenhin peles yỽ. ac y·ma

y doeth marchaỽc urdaỽl yr hỽnn a elwit a·ristor. ac a|e ỻada+

ỽd gỽedy offeren. a hynny o achaỽs nei a|oed idaỽ a elwit paredur.

yr hỽnn ny char ef dim o·honaỽ. Pan gigleu paredur y chw+

edleu hynny ny bu ˄dec ganthaỽ. ac yno y trigyaỽd ef y nos ~

honno. a|thrannoeth y bore ef a|vu yno ỽrth gladu y ewythyr.

A  phan|daruu yr offeren ef a|gychwynnaỽd paredur

ymeith. megys y neb a oed chwannaỽc y dial ar aris+

tor y kewilyd a|wnathoed. ac megys y bydei ef ueỻy nachaf

vorwyn ieuanc yn|dyuot y|myỽn. arglỽyd heb hi mi a vum

y|th geissyaỽ di yr ys|talym. ac ef a wyr  gỽalchmei hynny.

ac weldy racko arwyd ytt ar hynny. nyt amgen no|r penn ra+

co. yr hỽnn a|roes arthur ymi yn ymyl capel seint awstin. a

vnbennes heb·y paredur beth a|vynnut ti a|myui yr hynny.

Mi a vynnỽn heb hi dyuot o·honat ti y dial dy gevynderỽ nyt

amgen no mab brỽns|brandalis. yr|hỽnn nyt oed yn|y byt mar+

chaỽc weỻ noc ef. pei kaỽssoedyat hoedyl. a phan|darffo ytti y

dial ef. minneu a|gaffaf vyng|casteỻ yr hỽnn ny cheffir vyth

yny dialer ef. Pỽy a|e ỻadaỽd ef heb·y paredur. Arglỽyd heb

hi y marchaỽc urdaỽl coch o|r fforest dovyn. yr hỽnn yssyd ygyt