Breudwd Welsh Prose 1300-1425
Cymraeg

NLW MS. Peniarth 18 – page 45v

Brut y Tywysogion

45v

soes rys gryc a|e raculaennaỽd. Ac a|gadarnnhaỽd
y castell o|ỽyr ac arueu. A gỽedy llosci llann deilaỽ
y kilyaỽd ymdeith. Ac eissoes rys Jeuanc a gyrch+
aỽd y|castell a|thrannoeth dodi a oruc peiryannev
a|dychymygyon y|ymlad ar castell. a gỽneuthur
esgolyon ỽrth y|muroed y|ỽyr y drigaỽ dros y|mur+
oed. Ac velly y goresgynnaỽd ef y castell oll eithyr
vn tỽr. Ac ynn hỽnnỽ yr ym·gymerth y castellỽyr
ỽrth ymlad ac amdiffyn ac ergytyeu. a pheiran+
neu ereill ac ody allann y doeth saethydyon. ac
ar blastỽyr. a mỽynỽyr. a marchogyon yn ymlad
ac ỽynt. ac velly y kymhellỽyt arnunt kynn prynn+
haỽn talu y castell. a rodi tri gỽystyll a|ỽnaethant
a|rodi y castell. onny cheffynt nerth erbyn echỽyd
trannoeth trỽy amot caell* y dillat a|e haruev
a|e haelodeu yn yach. Ac velly y|gỽnaethpỽyt. a
gỽedy cael y castell y kilyaỽd rys gryc a|e ỽreic
a|e veibon. a|e teulu at vaelgỽn y|vraỽt ỽedy ca+
darnnhav castell llann ymdyfri o ỽyr ac aruev
a bỽyt. a|pheiryannev. ac aghenreideu ereill.
Ac eilỽeith yd aeth rys Jeuanc y vrecheinyaỽc
Ac yna kynullaỽ diruaỽr lu a|oruc o|gymry. a
ffreinc. a|chyrchu llann yn dyfri. a|chyn pebyllu
onadunt ef a|rodes y castellỽyr y castell idaỽ trỽy
amot. cael y heneitev a|e haelodeu yn yach. Y|vlỽy+
dyn honno y kymerth Jeuan vrenhin penyt am|y