NLW MS. Peniarth 190 – page 150
Ystoria Lucidar
150
y hoỻ engylyon a|e hoỻ seint o vyỽn ac
o·dieithyr. a|gogonyant duỽ. a gogonyant
y˄r egylyon. a|r padrieirch a|r proffỽydi. a|r
ebystyl. a|r merthyri. a|r confessoryeit a|r
gỽerydon. a|r hoỻ seint. ac ỽynt a|welant
eu ỻygeit e|hunein. a|e hỽynebeu a|e hoỻ
aelodeu o vyỽn. ac o·dieithyr. a medylyeu
paỽb yn wahanredaỽl. ỽynt a|welant
bop peth o|r yssyd yn|y nef newyd ac yn
y daear newyd. ac ỽynt a|welant eu gely+
nyon a|e poenes gynt ỽynt yn uffern.
ac o hynny oỻ y ỻawenhaant ỽy. megys
na aỻer y dywedut. discipulus O glywet y seint.
Magister Ewyỻys eu clywedigaeth a|gaffant ỽy
kanys ỽynt a gaffant ac a gymerant yr
arogleu bonhedigeidaf o ffynhaỽn yr
hynaỽster. ac o|r engylyon. ac o|r seint. ac
ỽrth hynny ewyỻys eu clywedigaeth a
gaffant. kanys a glywant armoni nef
a melys geinnyadaeth yr engylyon. ac or+
ganeu seint. discipulus O vlas y seint. Magister Ewyỻ+
ys eu blas a|gaffant. kanys gỽledeu a
| « p 149 | p 151 » |