NLW MS. Peniarth 190 – page 250
Penityas
250
neu o vod araỻ. O llosges tei o digassed. O
thynnaỽd o|r daear ardeu neu winỻan+
neu neb. O|r goganaỽd neb. neu o|r gỽa+
randewis ar y oganu yn chwannaỽc.
Ot emeỻdigawd ef neb drỽy vynnu y dy+
uot idaỽ. O rodes y laỽ ar y gymodaỽc o
vedỽl drỽc. Ot ymgeinyaỽd a duỽ a|r se+
int. O|r bu andiodefedic yn|heint neu dra+
ỻaỽt. O|r bu andiodefedic neu dryc·vedyly+
us am goỻet kereint neu da bydaỽl.
Am gynghoruynt a|e geingeu.
K Eingeu kynghoruynt. O|r bu law+
en o afles y gymodaỽc. O|dolurya+
ỽd drỽy gynghoruynt o ba|detwydyt byn+
nac a|delei o|e gymodaỽc. O chynghoruynnaỽd
ỽrth y neb a vei vch noc ef am nat kystal
ynteu ac ef. O chynghoruynnaỽd ỽrth y
gyffelyb am y vot mal ynteu. O chynghor+
vynnaỽd ỽrth a vei is noc ef o|r bei gyffelyb
idaỽ o|dim. O|r ỻeihaaỽd ef neu ot astudya+
ỽd y leihau da neu detwydyt neb o gyngor
| « p 249 | p 251 » |