NLW MS. Peniarth 32 (Y Llyfr Teg) – page 174
Llyfr Iorwerth
174
diebryt. O deruyd. y dyn dyuot y ty araỻ. ac ysgry+
byl ganthaỽ. neu da araỻ; pan el ymeith; ny
dyly vynet ganthaỽ nac epil. na|theil. na
chlutweir. na neb dotrefuyn o dim. namyn a
del ganthaỽ y|r ty. o byd hỽnnỽ. o·nyt amot
a|e dỽc. O deruyd. dỽyn buch yn ỻedrat; neu aniueil
araỻ; a meithryn o·honaỽ epil gan y dyn a|e
ry dycco. a gỽybot o|r perchennaỽc ỻe y bo y
aniueil. a cheissaỽ o·honaỽ y epil gyt a|r da.
ny|s|dyly namyn yr aniueil e|hun o|r|byd. ac o+
ny byd; ny dyly dim; kanyt a sỽỻt gan diebryt.
Pỽy bynnac a wrthotto iaỽn o debygu y vot
yn arglỽyd ar y haỽl. a gaỻu holi pan vynho.
gatter idaỽ beidaỽ. ac o peit vn dyd a blỽydyn;
bit haỽl tra blỽydyn hitheu. a honno ny dy+
lyir haỽl vyth amdanei. O deruyd. y dyn dỽyn at+
auael yn agkyfreithaỽl; atueret trachefyn hi. a|e haỽl
yn ir val kynt. Ny dyly kyfreith. ny|s|gỽnel. am yr
hynn ry wnaeth agkyfreith. am·danaỽ. ef ry wnaeth
iaỽn. a|e heturyt tra·chefyn. a|r haỽl yn ir ual
kynt. O deruyd. bot dyn yn vach. a chyn teruynu
yr haỽl; y vynet ef yn glafỽr. neu yn vynach.
neu yn diwyỻ ny thebycco ef dylyu atteb yg|kyfreith.
kyfreith. eissoes a|dyweit; dylyu o·honaỽ ef gywiraỽ
y edewit hyt tra vo byỽ. A hỽnnỽ yỽ vn o|r|ỻeoed
ny dyly y mab sefyỻ yn ỻe y dat. Sef achaỽs yỽ;
| « p 173 | p 175 » |