NLW MS. Peniarth 32 (Y Llyfr Teg) – page 224
Llyfr Iorwerth
224
gyon y ỻys. a|r dyd hỽnnỽ keissaỽ iaỽn o|r neb a
gauas y cam; kyfreith. a|dyweit na|s|dyly. ac na dyly
y sỽydaỽc ry gaffat y naỽd y gymheỻ idaỽ. a
hynny o vreint y dyd. ac ỽrth hynny y gelỽir ỽy
yn|dri tauaỽt|uud ỻys. O|deruyd y uonhedic tref+
tadaỽc mynet y wassanaethu uchelỽr. a|bot ys+
peit ygyt ac ef. a|e lad ar wassanaeth yr uchelỽr;
yr uchelỽr a|dyly teir|bu kelein ymdanaỽ. Ereiỻ
a|dyweit dylyu chỽe|bu ymdanaỽ. ac os byỽ vyd
ynteu. ef a|eiỻ mynet y ỽrth yr uchelỽr pan vyn+
no. dyeithyr adaỽ yr uchelỽr a dylyo ual y dywe+
it kyfreith. howel. a hỽnnỽ a|elwir karr ỻawedraỽc. sef
yỽ hynny; dyn a|uo carr·gychwyn pan vynno.
ỻaỽedraỽc yn hen gymraec yỽ tomaỽc. sef yỽ
hynny carr tomaỽc. Py deruyn bynnac y caf+
fer bydaf yndaỽ; kyfreith. a|dyweit bot yn iaỽn y|r
perchennaỽc. kymynu y prenn o bop parth. ac
y|r neb y dygwydo y prenn ar|y dir; y byd y vydaf.
Pỽy bynnac a vynno kynnydu; na charet
tri|pheth yn ormod; gỽreic. a meddaỽt. a hun.
Pỽy bynnac a vynno bot yn ygnat; dysget
yn|graff. Gouynnet yn vuyd. Gỽarandaỽet yn
ỻỽyr. Katwet yn|gofyaỽdyr. Datkanet yn|war.
Barnet yn drugaraỽc.
| « p 223 | p 225 » |