NLW MS. Peniarth 46 – page 172
Brut y Brenhinoedd
172
marc yn un ac ỽynt ỽrth ryuelu ar ̷+
nam ni. ac ỽrth hynny y|kyghoraf|i yti
gỽahaỽd rei o|r gỽyr hynny attat yn
ỽastat y|th lys mal y|gallont hỽy gỽybot
medwl y|kenedyl a|r brat a del o·dyno y|th
erbyn. a|phony ỽelỽch chỽi urat gỽrthe+
yrn. canyt y|kynal iechyt y|brenhin yd
ystryỽei ef hynn namyn gỽybot bot
yn ysgaỽnach annỽyt y fichteit no gỽyr
ereill. ac yn haỽs gantunt ỽneuthur kyf+
ulauan. a bot yn haỽd idaỽ ef eu kyffroi
hỽy ar lad y brenhin. a gỽybot gỽedy
darffei hynny y|caffei e|hun y|urenhina+
eth. a gỽahaỽd a|oruc gortheyrn cann
marchaỽc o|r ffichteit yn ỽyr y|r brenhin.
a|e henrydedu oruc udunt o|rodyon eur
ac aryant. a|dillat. a|meirch. a|daoed
ereill yny yttoedynt hỽy yn|y gymryt
ef yn lle brenhin. ac yna y|kenynt ỽy
kyỽydeu idaỽ ar hyt yr heolyd. Gỽrthe+
yrn yssyd teilỽg o|teyrnwialen ynys. prydein. a ̷
| « p 171 | p 173 » |