NLW MS. Peniarth 46 – page 199
Brut y Brenhinoedd
199
a gouyn a|ỽnaeth myrdin y|deỽinyon beth
oed yn llesteiraỽ y|gỽeith. ac ny allyss+
ant atteb idaỽ. ac yna y|dyỽat Myrdin.
arglỽyd hep ef. arch di dỽyn dy weith+
ỽyr di y|gladu y dayar yma. a|thi a|geffy
lynn ydan y|dayar a|hỽnnỽ ny at y|r gỽe ̷+
ith seuyll. a gỽedy cael y llynn. y|dyỽat
Myrdin eilỽeith ỽrth y|deỽinyon. Dyỽedỽch
tỽyllỽyr bratỽyr kelỽydaỽc. beth yssyd
ydan y|llynn. a|theỽi a|ỽnaethant me ̷ ̷+
gys pei|bydynt mut. ac yna y|dyỽat
myrdin. arch di disbydu y|llynn trỽy
ffrydyaỽ. a|thi a|ỽely deu uaen geuon
yn|y gỽaelat. ac y|myỽn y|deu|uaen dỽy
dreic yn kysgu. a chredu a|ỽnaeth y|bren+
hin idaỽ cann dyỽedassei ỽir am|y llynn.
kynn o|hynny. ac erchi dispydu y|llynn
ac enryuedu a|oruc ef doethinab Myr+
din. a|phaỽb o|r a|oed ynn|y lle. a|chredu
bot dỽyỽaỽl doethineb a|gỽybot yndaỽ.
llyma y dechreuir y prohỽydolyaeth. ~ ~ ~
| « p 198 | p 200 » |