NLW MS. Peniarth 46 – page 26
Brut y Brenhinoedd
26
ac odyna yd aethant yrỽg ruscan a
mynyned azaree. ac yna y|bu ymlad
maỽr arnadunt gann genedyl y|pira+
tas. a gỽedy goruot ar|yr rei hynny o+
nadunt. kymryt llaỽer o|yspeileu y|rei
hynny a|orugant. ac odyna y doethant
hyt ym maritan. ac y|bu reit vdunt o
dlodi bỽyt a llynn mynet y|r tir o|r llog+
heu. ac anreithaỽ y|ỽlat a|orugant o|r
emyl y gilyd. a gỽedy llenỽi eu llogeu o
bop ryỽ da y|doethant hyt yg|kolofnev
ercỽlff. ac yna yd|ymdangosses y|mor+
voryon vdunt. a damgylchynu eu llog+
hev ac eu sodi hayach o gỽbyl. ac ody+
na y|doethant hyt y|mor tyrev. a|chyr
llaỽ y|mor hỽnnỽ y caỽssant pedeir ke+
nedyl o alltudyon tro. o|r rei a|ffoassei y+
gyt ac anthenor o tro. ac yn tyỽyssa+
ỽc arnadunt. corineus y gwr goreu o|r
gỽyr mỽyhaf y nerth a|e leỽder. a|e ge+
dernyt. a gỽedy ymadnabot onadunt
| « p 25 | p 27 » |