Cambridge Trinity College MS. O.7.1 – page 13r
Llyfr Blegywryd
13r
ef a dyly gỽrtheb idaỽ or dylyet oll
kyny chymero ffyd y talaỽdyr. Gỽedy
del oet dyd talu. y mach a dyly oet
dyd y gyfarch y talaỽdyr. Oet mach
y parottoi tal. vn dyd ac ỽythnos.
or byd reit idaỽ talu. O teir fford yd
oedir mach a chynogyn o glybot
corn y brenhin yn mynet yn lluyd.
Ac o haỽl treis. Ac o haỽl ledrat.
Teir meuylỽryaeth mach yssyd;
gỽadu y vechni. ac ef yn vach. Ac
adef y vechni ac na allo y chymell.
a diebryt y mach gỽedy rother.
Mach a dyly dỽyn gauael gyt ar
dylyaỽdyr hyt yn diogel. neu talet
e hunan. Na chymerer y talaỽdyr
onyt y mach ay dyry. Kyt el mach
mach* dros talu. na thalet hyny pallo
y talaỽdyr. ny byd palledic ynteu
tra saffo ỽrth gyfreith. kyny bo idaỽ
namyn tri thudedyn. ef a dyly talu
y deu a chynhal y tryd* ym+
danaỽ ympob amser. Mach|a watto
y vechni gỽadet ar y seithuet or
| « p 12v | p 13v » |