Breudwd Welsh Prose 1300-1425
Cymraeg

Cambridge Trinity College MS. O.7.1 – page 23v

Llyfr Blegywryd

23v

arnaỽ yn yscriuennedic. Or kyrch
ki ar dyn. dodet y dyn y aryf y·rydaỽ
ar ki. ac or a ar yr aryf hyny lather.
ny thelir dim drostaỽ. Or brath ki
dyn hyny del y gỽaet; perchen y ki
a dyly talu gỽerth y gỽaet yr brathe  ̷+
dic. ac or llad y dyn brathedic y ki
kyn y dianc y ỽrthaỽ; ny cheiff onyt
un ar pymthec dros y waet. Ki ke+
neuodic ar urathu dynnyon or brath
tri dyn ac nas llatho y arglỽyd yno.
y rỽymaỽ a dylyir ỽrth troet y ar+
glỽyd a raff o dỽy rywant. Ac yno
y lad. A thalet gamlỽrỽ yr brenhin.
Ny thelir na dirỽy na chamlỽrỽ
am ederyn dof a lather neu a
dycker ledrat. namyn y werth yr
perchen. Y neb a dycco nyth hebaỽc.
talet yr brenhin. Gỽerth hebaỽc coch
kyn mut. hanher punt yỽ. Gỽedy
tynher or mut mal yn wen; punt
a tal. Gỽerth hỽyedyd; pedeir ar|hu+
geint. Nyth llamysten; pedeir ar|hugeint
yn goch; deudec keinhaỽc. Or byd gỽen
gỽedy mut; pedeir ar|hugeint a tal.