LlGC Llsgr. 24049 (Boston 5) – tudalen 29
Llyfr Blegywryd
29
beitto ac wẏnt. A|brethẏn ẏ|wely. a e vantell.
a|e|beis. a|e grẏs. a|e laỽdỽr. a|e hossaneu. a|e
esgittẏeu. MOrỽẏn ẏstauell brenhines;
a|gei*|sscoet*. eithẏr ẏr rei ẏd aruerho ohonu+
nt ẏ|garawẏs. Hi a|geiff hen gẏfrỽẏ ẏ|vre ̷+
nhines. a|e hen ffrỽẏnneu. a|e hesgittẏeu.
Gwas ẏstauell a geiff ẏr anneired. a|r ende+
riged. o anreith a|dẏccer o orwlat. Os teu ̷+
lu ẏ brenhin. neu wẏr ẏ|wlat a gẏmerant
anreith ẏg|gwlat ẏ|brenhin. ẏr anreithw+
ẏr a gaffant ẏ rẏỽ eidonneu hẏnnẏ O|r
daỽ bard teulu ẏ erchi at ẏ brenhin. kanet
idaỽ vn canu. Os at vchelỽr ẏ daỽ; kanet
tri. Os vilaein ẏ|daỽ; kanet ẏnnẏ dẏffẏcc+
ẏo. Os bard teulu a gan bardoni ẏgẏt a|th+
eulu ẏ brenhin ỽrth dỽẏn anreith. ẏ|llỽd ̷+
ẏn goreu o|r anreith a|geiff. Ac o|r|bẏd dar+
par ẏmlat arnunt; canet ẏ canu a|elỽir
vn·beinaeth brẏdein. racdunt. Pan el ba+
rd teulu ẏnn|ẏ sỽẏd. ẏ|keiff telẏn ẏ|gan
ẏ|brenhin. A|modrỽy eur ẏ|gan ẏ|vrenhin+
es. A|r|telẏn nẏ|s gat ẏ|ỽrthaỽ. Gobẏr ẏ|ver+
| « p 28 | p 30 » |