Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 141v
Gwlad Ieuan Fendigaid
141v
yd yn erbyn yn gelynnyon teir croc ar|dec maỽr
arderchaỽc gỽedy gỽnneuthur o eur ac ary+
ant a mein gỽerthuaỽr yndunt. Vn ym|pob ker+
byt yn lle arỽydon rac yn bronn ni a barỽn eu
harỽein. Ac yn ol pob vn ohonunt. deudec mil o
wyr aruaỽc. A chann mil o|bedyt o ỽyr ymlad.
heb a|uo vrth y|pynn vil. Ac yg|kylch dỽyn bỽyt
a|diaỽt. Pann gerdom nyheu hagen ar yn hed+
dỽch rac bronn yn maỽrỽrdaeath ni. y raculaen+
ha croc brenn heb ysgỽthyr yn|y byt arnei nac
o eur nac o aryant. hyt pann cof del yni yn pre+
sỽyl. diodeifeint yn arglỽyd ni iessu grist. A|lles+
tyr yn llaỽn o|brid hyt pann adnapom ni mynet yn
knaỽt ni yn|y briaỽt voned. Sef yỽ hynny yn brid.
A|llester arall yn llaỽn o eur a|dygir rac yn bronn.
hyt pann dyallo paỽb yn bot ni yn arglỽyd yr ar+
glỽydi. O|bop ryỽ oludoed o|r ysyd yn|y byt yd am+
ylha ac y|raculaenna yn maỽrỽrdaeath ni. Ny
dyỽeit neb gelỽyd yn yn plith ni. ac ny eill neb y
dyỽedut. A|phỽy|bynnac a|dyỽetto kelỽyd dan|y|ỽy+
bot idaỽ. ar hyt y|byd marỽ. Sef yỽ hynny. ny|do+
dir messur arnaỽ moe noc ar dyn marỽ. Ac ny
delhir adlo ymdanaỽ. Paỽb o·honam ni a erlynn
y|ỽironed. a charu a|ỽna paỽb ohonam ni y|gilyd.
ỽers tra|gyỽers. Ny ỽledycha neb ryỽ bechaỽt
| « p 141r | p 142r » |