LlGC Llsgr. 3035 (Mostyn 116) – tudalen 183r
Brut y Tywysogion
183r
ac einaỽn ap rys o|werthrynẏon y daỽ y ỻaỻ. a Morgan
ap cradaỽc ap jestẏn o|wlat vorgan o|wladus y chỽaer
a joruerth ap ywein o gaer ỻion a seissyd ap dyfynwall o|went
vch y coet y gỽr yd oed yna yn briaỽt gantaỽ wladus whaer
y|r arglỽyd rys. hyny oỻ o|tywyssogyon a ymhoelassant
y|ỽ gỽladoed ẏn hedychaỽl gyt a|r arglỽyd rys y|gỽr a oed
garedickaf gyfeiỻt gan y brenhin yn yr amser hỽnỽ drỽy
ymchoelut kaer ỻion drachefẏn y joruerth ap ywein. Yn|ẏ
ỻe wedy hẏnẏ y|ỻas seissyỻ ap dyfynwal drỽy dỽyỻ arglỽyd
brecheinaỽc a|chyt ac ef ruffud y vab a ỻawer o|benadur+
yeit gỽent. ac yna y|kyrchaỽd y|freinc lys seisyỻ ap dyfyn+
wal a gỽedy dala gỽladus y wreic y|ỻadassant catwaladyr
y|vab a|r dyd hỽnỽ y|bu y druanaf aerua ar wyrda gỽent
a gỽedy y gyhoededicca danỻyỽechedic dỽyỻ hono ny bei+
daỽd neb o|r kymrẏ ymdiret y|r freinc ac yna y bu varỽ
cadeỻ ap gruffud drỽy orthrỽm glefẏt ac y|cladỽyt yn ys+
trat flur wedy kymrẏt abit y|crefẏd ymdanaỽ. ac yna
y|ỻas ricart abat clerynaỽt myỽn manachlaỽc yn ymyl
remys y gan neb vn anfydlaỽn vynach o vrath kyỻeỻ.
Y vlỽydẏn racỽyneb y bu varỽ kynan abat y|ty gỽyn
a dauid esgob mynyỽ. ac yn|y ol y|dynessaaỽd pyrs yn esgob
ac yna y|kynhalaỽd yr arglỽyd rys wled arbenhic yg|kas+
teỻ aber teiui. ac y gossodes deu ryỽ amrysson. vn rỽg
y beirẏd a|r prydẏdẏon. ac araỻ ac* araỻ* yrỽg telynoryon
a chrythoryon a|phi·bydyon ac amryfaelon genedloed gerd
arwest. a dỽy gadeir a ossodes y vudugolyon yr amryssoneu
a|rei hẏnẏ a gyfoethoges ef o diruaỽryon rodyon. ac
yna y|cauas ef gỽas jeuanc o|e lys e|hunan y vudygolyaeth
| « p 182v | p 183v » |