LlGC Llsgr. 3035 (Mostyn 116) – tudalen 54r
Brut y Brenhinoedd
54r
gỽeiryd yn vrenhin. Ac y dechreuis attal teyrnget gỽyr
rufein Ac yna y|doeth. Gloyỽ amheraỽdẏr rufein a ỻu
gantaỽ y|ynys prydein y gymeỻ y teyrnget drachefyn
A lelius hamo tywyssaỽc y ymladeu gyt ac ef. yr hỽn
ny wnaei yr amheraỽdyr dim heb y gygor. Ac y doethant
y borthestyr y|r tir. Ac yna y dechrouassant kayu y|pyrth y
dinas a mur maen mal na chaei neb o vyỽn vynet aỻan
kanẏs eu brẏt oed eu gỽarchae a|e kymeỻ drỽy newyn y
wedaỽl darystygedigaeth vdunt A gỽedy dyuot y|chwedyl
at Vydyr kynuỻaỽ a oruc ynteu hoỻ ymladwyr ynys|pry+
dein yn|y erbẏn. A gỽedy dyuot y deu lu yn gyfagos. A
gỽedy bydinaỽ o pop parth dechreu ymlad a molestu y elynyon
a|wnaeth gỽydyr yn ỽychyr. A mỽy a|ladei e|hun no|r ran
vỽyaff o|e lu Ac ar hẏnnẏ yd oed yr amheraỽdẏr a|e lu
yn kyrchu y logeu dan fo pan aeth yr emeỻtigedic tỽyỻỽr
bradỽr gan hamo A chymrẏt arueu vn o|r brytanyeit a|r
ladyssei Ac yn yr arueu hynnẏ annoc y brytanyeit me+
gys kyt bei vn o·nadunt Ac adaỽ vdunt y|vudugolyaeth
o|perheynt veỻy. kanys ieith a|deuodeu y brytanyeit a|dys+
gassei ym|plith y|gỽystlon a oed yn rufein o|ynys prydein
Ac veỻy kerdet yn ystrywys drỽy y bydinoed yny doeth
gyr ỻaỽ y|brenhin A|phan welas ỻe ac amser taraỽ y ben y|r
maes a chledyf A|ỻithraỽ drỽy y|bydinoed hyny doeth ar
y|lu e|hunan. gan yr yskymyn vudugolyaeth honno A|gỽe+
dy gỽelet o|weiryd adarweindaỽc ry lad y brenhin. bỽrỽ y|arueu
e|hun a oruc a|gỽisgaỽ arueu y|brenhin Ac annoc y|getym+
deithon y ymlad A gyrru angerd yndunt megys kyt bei
euo. vei y brenhin. A|phaỽb a vu ỽrth y|dysc ynteu. kanẏ
ỽydynt etwa ỻadedigaeth y brenhin. A gỽedy ymlad yn
drut ac yn galet. ỽynt a|wnaethant aerua diruaỽr oc
| « p 53v | p 54v » |