LlGC Llsgr. Peniarth 11 – tudalen 220v

mileindra a|r kewilyd yd oedut titheu yn|y wneuthur idi ac o|e|che+

nedyl. Myn vym|penn i heb y marchaỽc yr honn yd oedỽn i yn|y  ̷

charu yr aỽr honno dim ohonat ti nys car hi. a|hi a|wna enwiet*

ytt os dichaỽn. a hitheu a|e dichaỽn. Ny|m taỽr heb·y laỽnslot ~

myui a ymdideneis a|hi wedy hynny. a|hi a|dywaỽt ỽrthyf|i y hew+

yỻys. Yna y marchaỽc a|erchis roi dỽfyr y ymolchi. a|r wreic a

gymerth y kaỽc a|r|lafỽr ac a|e kennigyaỽd y|r marchogyon. A  ̷

vnbennes heb y brenhin ny mynnỽn i y ryỽ wassanaeth hỽnnỽ

o|th laỽ di. Ar vyng|cret heb y|ty ef a vyd reit reit y gymryt ac|ny

cheffỽch chỽi yn|y gỽassanaeth hỽnnỽ neb namyn hi. Laỽnslot a  ̷

adnabu vot y gỽr yn vilein. ac ef a|welei y bỽrd yn|ỻaỽn o|vỽydev

da. ac a|vedylyaỽd nat oed da udunt goỻi eu hesmỽythdra o acha+

ỽs yr anesmỽythdra a vuassei arnunt y nos gynt. Yna kymryt

y dỽfyr a|wnaethant y gan y wreic. a|r|gỽr a|e gossodes y eisted. a|r  ̷

brenhin a|erchis y|r wreic eisted y·gyt ac ỽynt. Nac ef heb y gỽr

ny doeth idi y dyd hỽnnỽ etto. Yna y·gyt a|r ysgỽieryeit yd eisteda+

ỽd hi megys y gỽnaei yn wastat. Drỽc vu gan arthur a|e gedym+

deithyon hynny. ny mynnynt ỽynteu ỽrthỽynebu y|r gỽr yn|y ty

e|hun. Pan|daruu udunt vỽyta y marchaỽc a|dywaỽt ỽrth

laỽnslot. ti a|wely y ryỽ anryded a gafas hi achaỽs a|wnaethost di

ac myn|duỽ tra vỽyf vyỽ i ny cheiff hi o anryded mỽy. kanys  ̷

ueỻy yd edeweis i yr|honn a|garaf i yn vỽy no hi. Arglỽyd heb·y

laỽnslot ef a|welir ymi dy|uot ti heb aỻel ymadaỽ a|phechaỽt.

a mi a|debygaf heuyt nat diogan hynny ytt. Yna laỽnslot a

dywaỽt ỽrthaỽ yng|gỽyd arthur a|gỽalchmei. pany bei lettyu

o|r gỽr ef. y coỻei beth o|e waet. neu ynteu a|vei weỻ ỽrth y wreic.