LlGC Llsgr. Peniarth 11 – tudalen 23v
Ystoriau Saint Greal
23v
Ac amovyn a|oruc gỽalchmei ac owein pa anturyeu a gyfar+
vuassei ac ef yr pan ymwahanyssynt. ac ynteu a|dywaỽt na
welsei ef yr vn. Marchocaỽn ninheu yn tri weithyon heb+
y|braỽt gỽalchmei. yny gyfarffo a|ni ryỽ antur. ac ueỻy y
kytunassant. a marchogaeth a|wnaethant yny doethyant
parth a|chasteỻ y morynyon. a|r dyd hỽnnỽ y goruuassei
galaath ar y seith marchaỽc. ac ỽynteu pan ffoassant
a|gyfaruuant a gỽalchmei a|e gedymdeithyon. Ac yna
y seith mroder a|adnabuant mae rei o uarchogyon y keis
oedynt. Ac vn onadunt a|dywaỽt ỽrth walchmei. ymdiff+
ynnỽch heb ef. kanys chwi a|doethaỽch ar|angheu. Yna
gỽalchmei a|e gedymdeithyon a|e kyrchassant. Ac ar|y
ruthur gyntaf ef a|las tri o|r seith. Ac yna tynnv cledyfeu
a|orugant a|ruthraỽ y|r ỻeiỻ. ac ny bu hir yny daruv udunt
eu|ỻad oỻ. kanys blin oedynt. Ac yno eu gadaỽ yn veirỽ
a|orugant ac ymchoelut y ỽrthunt. ac nyt aethant ỽy
ynghyvyl y kasteỻ. namyn pob vn onadunt a|ymwaha+
naỽd y ỽrth y gilyd. ac o achaỽs hynny y koỻassant ỽy ga ̷+
laath. A gỽalchmei a|gerdaỽd racdaỽ yny doeth y ty meu+
dwy. yr hỽnn a|oed yn|dywedut gosper o veir. ac yno disgyn ̷
a|wnaeth. a|gỽedy gosper. erchi ỻetty yr duỽ y|r meudỽy
yr hynn a|gafas yn ỻawen. A|r nos honno. ef a|o·vynnaỽd
y meudwy idaỽ ef pa|vn oed. a|pha|gerdet a|oed arnaỽ. ac ̷
ynteu a|dywaỽt idaỽ ef kỽbyl o|e|hoỻ gyflỽr. A|phan wybu
y gỽr·da mae gỽalchmei oed yno. ef a|dywaỽt yr|oed da gan+
thaỽ pei|gỽypei y ba neges yd|oed ef yn|ỻauuryaỽ ueỻy.
| « p 23r | p 24r » |