LlGC Llsgr. Peniarth 11 – tudalen 47r
Ystoriau Saint Greal
47r
a|dywaỽt yna. Peredur heb hi. dabre yma y eisted yny
ostyngho gwres yr|heul. ac ynteu a|aeth y|myỽn. a chys+
cu a|oruc myỽn gỽely. ac eissyoes hi a beris tynnu y ar+
ueu y amdanaỽ. a gỽedy kyscu ruthyr o·honaỽ. hi a|e deffro+
es. ac a|erchis dyrchafel bỽrd y vynet y vwyta. Ac ueỻy y
gorucpỽyt. ac ny welsei ef eirioet ỻe diwaỻach o bop da.
A|phan erchis ef diaỽt. ef a|ducpỽyt gỽin idaỽ. ~ ~ ~
R Yued uu gan beredur gael gỽin. kanys yn|yr amser
hỽnnỽ nyt oed chweith gỽin ym|bryttaen uaỽr o+
ny bei yn ỻe tra chyuoethaỽc. Sef a|oruc peredur yuet
y|gỽin yn ffest. a medwi odieithyr messur. Ac yna edrych
a|oruc ef yn|ỻygeit yr unbennes rec tecket y gwelei. kanys
ny|wydyat ef eiryoet welet yr vn kyn|decket a hi. A|chyn|hof+
fet vu ganthaỽ ef hi. ac yr|adolygaỽd idi y charyat. a gỽneu+
thur yrdaỽ. A|hitheu a|e nackaaỽd ef. yr peri idaỽ vot yn chỽ+
annogach idi. ac yn|didiffyc yr ymbiliaỽd ef a|hi. A|phan y
gỽeles hi efo gỽedy kỽympaỽ yn|y charyat hi. hi a|dywaỽt
ỽrthaỽ. Peredur heb hi gỽybyd di yn|ỻe gỽir na|wnaf|i yrot ti
dim ony rody ditheu dy gret ar uot yn vn·tuaỽc ygyt a|myvi
yn erbyn bop dyn. ac na|wnelych dim onyt a archwyf|i. Na
wnaf y·rof|i a|duỽ heb ynteu. ac ar hynny ymgredu a|orugant.
Yna hitheu a|dywaỽt. Peredur heb hi. gỽybyd di yn|ỻe gỽir
nat|kyn|hoffet gennyt ti vyng|kael i. a|chennyf|i dy gael di. ~
Ac yna hi a|erchis o|e|gỽeissyon gỽneuthur y gỽely. Ac yna
y gỽely a|wnaethpỽyt ym|perued y pebyỻ. ac y|r gỽely hỽnnỽ
yd aethant peredur a|r vorwyn y|gysgu. A|phan yttoed beredur
| « p 46v | p 47v » |