LlGC Llsgr. Peniarth 11 – tudalen 53r
Ystoriau Saint Greal
53r
Mi a ỽnn heb hitheu beth yd ỽyt ti yn|y geissyaỽ. ti a|uuost
gynt yn nes idaỽ noc yr|wyt yr aỽr·honn. A vnbennes heb
ynteu ef a|r|aỻei vot yn wir a|dywedy di. ac a|wdost di uenegi
ymi pa|le y kaffwyf chweith ỻetty heno. A unbenn heb hi ̷+
theu ti a|e keffy. ac ef a|vyd hỽyr iaỽn kynn|ys|keffych o·ny
cherdy a|vo kynt. ar hynny y kerdaỽd laỽnslot racdaỽ. ac y
doeth hyt y|myỽn glynn. Ac yno ef a|gyfaruu ac ef y marcha+
ỽc a|dugassei y arueu yn ymyl y groes pan welsei ef seint gre+
al. a|hỽnnỽ a|doeth tu ac att laỽnslot heb gyuarch gweỻ idaỽ.
a|than dywedut ymogel ragof neu ynteu yd ỽyt yn varỽ os
mi a|vyd trech no thi. Ac yna gostỽng gwaeỽ a|e gyrchu a|oruc
a|e daraỽ yny dyrr y arueu ym pob ỻe dyeithyr y gorff ef a|di+
henghis. A laỽnslot a|e treỽis ynteu yny vyd y|ar y varch y|r
ỻaỽr. ac yny vu agos y|r march a|thorri y vynỽgyl. Ac yna
laỽnslot a|gymerth y march erbyn y ffrỽyn. ac a|e rỽymaỽd
ỽrth vn o|r|prenneu ual y gaỻei y marchaỽc pan gyuotei o|e
lewyc y gaffael. A gỽedy daruot idaỽ hynny efo a|aeth o|e fford
ac a|varchockaaỽd yny vu nos. ac yna ef a|arganuv meudỽy+
dy a|thu ac yno y doeth ef y lettyu. a|r meudỽy a|vu lawen ỽrth+
aỽ ac a|duc y varch y myỽn. a bỽyt a rodet idaỽ digaỽn. A|gỽedy
hynny diarchenu laỽnslot a|orucpỽyt. a mynet y vỽyta ef a|r
meudỽy a|wnaethant. A gỽedy bỽyt rac y vlinet laỽnslot a|aeth
y gysgu hyt y|dyd drannoeth. ~ ~ ~
T Rannoeth y bore ef a|gyfodes laỽnslot y vyny ac a|aeth y
warandaỽ offeren. A gỽedy daruot yr offeren ef a|gym ̷+
merth y arueu ac a|esgynnaỽd ar y varch ac a|aeth ymeith.
| « p 52v | p 53v » |