LlGC Llsgr. Peniarth 18 – tudalen 27v
Brut y Tywysogion
27v
a|therỽyn. garỽ ỽrth y elynnyon. Digrif ỽrth y gyueill+
on. hir y|dyat. gỽyn y|liỽ. pengrych melyn y|wallt. hir
y|ỽyneb. goleisson y legeit llydanyon llaỽenyon. Mynỽg+
yl hir braf. Dỽy vron lydan. ystlys hir. Mordỽydyd pra+
ffyon. esgeireu hiryon ac oduch y|draet yn vein. traet
hiryon a byssed vnyaỽn idaỽ. a|phan doeth whedel y irat
agheu ef att yỽein y dat ef a|godet ac a|dristaỽd ym* gy+
meint ac na allei y|hyfrytau ef na|thegỽch teyrnas na
digrifỽch na|chlayar didanỽch gỽyrda nac edrychedi+
gaeth maỽrỽeirthogyon betheu. Namyn duỽ racỽel+
aỽdyr pop peth a|drugarhaỽd o|e arueredic deuaỽt a|dru+
garhaỽd ỽrth genedyl y bryttannyeit rac y colli me+
gys llog heb lywyaỽr arnei ac a|getỽis vdunt yỽein
yn dyỽyssaỽc arnunt. kanys kynn kyrchassei aniod+
efedic dristyt vedỽl y|teỽyssaỽc. eissoes ef a|e|dyrchafaỽd
deissyuyt lyỽenyd drỽy racweledigaeth duỽ. canys yd
oed nebun gastell a|elỽit y rỽydgruc y buyssit yn vy+
nych yn yn* ymlad ac ef heb dygyaỽ. a phan doeth gỽ+
yrda yỽein a|e deulu y ymlad ac ef ny allaỽd nac any+
an y lle na|e gedernit ymỽrthlad ac wynt. hyny
losget y castell. ac yny diffeithỽyt ỽedy llad rei o|r cas+
tellỽyr a|daly ereill a|e karcharu. a|phan gigleu yỽein
yn teỽyssaỽc ni hynny. y gellygỽyt ef y|gan pop
dolur a|phop medỽl cỽynuanus. ac y doeth yn rym+
mus yn yr anssaỽd yd oed arnaỽ gynt. Y|ulỽyd+
yn racỽyneb yd|aeth lewys vrenhin freinc ac am+
| « p 27r | p 28r » |