LlGC Llsgr. Peniarth 33 – tudalen 72
Llyfr Blegywryd
72
llẏdẏn nẏt oes werth kẏfureith arnunt.
knẏỽ hỽch. A|bẏtheiat. A|charlỽg Tri
gỽaet digẏfreith ẏssẏd; gỽoet* o|benn
crach. A|gỽaet deint. A|gỽaet trỽẏn. on ̷+
nẏt trỽẏ lit ẏ gollẏgir. Tri than
digẏureith a|dotto dẏn ẏnn|ẏ tir e|hun
ẏssẏd; tan godeith o|hanner maỽrth
hẏt hanner ebrill. A than odẏn tref+
gord. A than geueil trefgord. a vo naỽ
cam ẏ|ỽrth ẏ|tref. a|tho banadẏl. neu
tẏwarch arnei. Tri edẏn ẏ|dẏlẏ ẏ
brenhin eu gỽerth pẏ|tut* bẏnnac y|lla+
ther hebaỽc. A|gỽalch. A chicuran. Per+
chennaỽc ẏ|tir ẏ|llather arnaỽ a|dẏlẏ
dec ar|hugeint ẏ|gan ẏ|neb a|e ỻadho.
Tri phrẏf ẏ|dẏlẏ ẏ|brenhin eu gỽer+
th pẏ|dut* bẏnnac ẏ|llather. llosclẏdan
A|beleu. A charllỽg. kannẏs ohonunt
ẏ|gỽneir amraỽẏeu* y|dillat ẏ|brenhin
Tri pheth nẏ at kẏfureith eu dam+
tỽg. Blaỽt. A|gỽenẏn Ac arẏant bath
kannẏs. kẏffelybrỽẏd a|geffir vdunt.
Tri phren ẏssẏd rẏd eu llad ẏn ffo+
rest brenhin; Pren crip|eglỽẏs. A|phren
| « p 71 | p 73 » |