Breudwd Rhyddiaith Gymraeg 1300-1425
English

LlGC Llsgr. Peniarth 38 – tudalen 35r

Llyfr Blegywryd

35r

ny eill ef dim yn|y herbyn. kanys credadỽy yỽ y|th+
ystolyaeth hi yn|y lle hỽnnỽ. Y neb a dycco treis
ar ỽreic; y hamobyr a|e dirỽy a|tal y|r arglỽyd. ac
y|r ỽreic tal y sarhaet a|e hegỽedi a|e dilysrỽyd. Os
gỽadu a vyn y gỽr. ac os katarnha y|ỽreic yn|y er+
byn; kymeret hi gala y gỽr yn|y llaỽ asseu. a|thyg+
het hi yr dỽyn treis ohonaỽ ef erni hi. ac velly ny
chyll hi dim o|e iaỽn. Y neb a|ỽatto treisso gỽreic;
rodet lỽ degỽyr a|deugeint. neu dirỽy treis. Nyt
oes y|ghyfreith hyỽel yspadu gỽr yr treissaỽ gỽreic
O tri achaỽs ny|chyll gỽreic y hegỽedi kyt adaỽ+
ho y gỽr. o glafyri. ac eisseu kyt. a|drycanadyl Te+
ir gỽeith y keiff gỽreic y hỽnebỽerth; yn gyntaf
y keiff ỽheugeint. yr eilỽeith punt. y tryded ỽeith;
adaỽet y gỽr ac aet a|e holl dylyet genti. ac os dio+
def dros hynny; ny cheiff dim yn|y hỽynebỽerth.
Ony ỽna morỽyn a vynho o|e choỽyll kyny chy+
fot y boreu o|e gỽely y|ỽrth y gỽr. yghyt y byd y·rydunt
o hynny allan. O rodir morỽyn aeduet y ỽr; ac
o|r diỽeit* y gỽr nat oed vorỽyn hi; tyghet y vorỽyn