Llsgr. Caerdydd 1.363 (Hafod 2) – tudalen 125r
Brut y Brenhinoedd
125r
el a heyngyst.
AC ỽal ed oedynt e ỽelly er amraỽylyon ỽy+
dynoed en emkyrchv o damweyn wynt a
emkyfarfỽant y gyt a dechreỽ newydyaỽ dyrn+
odev. Ena e gwelyt ymladwyr amgen no nep hyt
tra edoedynt en newydyaỽ cledyfỽeỽ pob ỽn en
llafỽryaỽ agheỽ o|y gylyd. Ena e gwelyt e tan
o|r cledyfỽeỽ ac o|r helmeỽ en eskeynnyav megys
llwuchyat em blaen taran. A hyr e bỽant hep
wybot pwy orev na phwy dewraf na pha dyw
e delhey e wudvgolyaeth onadvnt. kanys gwe+
ythyeỽ ed estynghey eydol ac e bydey trechaf
heyngyst. gweythew ereyll e darestynghey he+
yngyst. ac e bydey gwychaf eydol. Ac ỽal ed oedy+
nt ene* e wed honno en amrysson enachaf Gwrl+
eys tewyssaỽc kernyw a|e vydyn en kyrchỽ er
rey gwrthwynep ac en kywarssanghỽ eỽ torỽo+
ed. Ac y gyt ac y gweles eydol hynny ehofynder
a hyder a kymyrth endav a chymryt heyngyst
a gwnaeth erbyn baryfle y penffestyn ac arverỽ
o|y holl nerthoed a|e tynnỽ ganthav hyt pan ỽyd em perỽ+
ed kedernyt y kywdaỽdwyr e hvn. a chan dyrỽ+
aỽr lewenyd en wuchel e dywaỽt ỽal hynn.
| « p 124v | p 125v » |